«Аддадзена каманда на зачысткі». Карпянкоў расказаў, як сілавікі рыхтуюцца змагацца з апазіцыяй
Унутраныя войскі правялі 24 сакавіка на аэрадроме Ліпкі спецыяльныя вучэнні па разгоне масавых пратэстаў. Намеснік кіраўніка МУС — камандуючы ўнутранымі войскамі Мікалай Карпянкоў распавёў СТБ, як і да чаго рыхтуюцца сілавікі.
Карпянкоў распавёў, што сілавікі аналізуюць досвед ваенных дзеянняў ва Украіне. Звярнулі ўвагу на ўжыванне беспілотных лятальных апаратаў. У пачатку лютага загадам міністра ўнутраных спраў у такіх падраздзяленнях органаў унутраных спраў, як АМАП, «Алмаз», унутраныя войскі, створаны спецыяльныя падраздзяленні па прымяненні беспілотнай авіяцыі.
«У нас ёсць дроны, разведвальныя з цеплавізарам, дроны разведвальна-ўдарныя, якія могуць ажыццяўляць бомбакіданне. І ў нас ужо ёсць дроны-камікадзэ, дастаткова вялікая колькасць.
Зараз ажыццяўляецца вялікая закупка, і літаральна за лічаныя тыдні на ўзбраенні ў нас будзе знаходзіцца тысяча дронаў. Усіх вайскоўцаў, якія ў нас займаюцца беспілотнай лятальнай авіяцыяй, мы аднеслі да катэгорыі спецыяльнага прызначэння, да байцоў спецыяльнага прызначэння.
І вось у гэтых падраздзяленнях спецыяльнага прызначэння, якія ў нас у войсках створаны, — 3214, падраздзяленне «Рысь», падраздзяленне «Беркут», якое сёння працуе на мяжы, плюс дадаткова ва ўсіх часцях і злучэннях мы стварылі роты і ўзводы спецыяльнага прызначэння, — ужо зʼявіліся цэлыя на гэты момант сілы хуткага рэагавання Міністэрства ўнутраных спраў. У нас усюды там беспілотныя лятальныя апараты», — распавёў Карпянкоў.
Паводле яго, у Беларусі стварылі навучальны цэнтр, запрасілі спецыялістаў, якія прыехалі з Данбаса і «самыя эфектыўныя тактычныя прыёмы паказалі».
Карпянкоў распавёў, што на вучэннях у Ліпках адпрацоўвалі, як дронамі абследаваць кожны дах, каб не «празяваць ніякага снайпера».
Таксама ён расказаў, як сілавікі рыхтуюцца змагацца з калонамі пратэстоўцаў.
«Ужыванне газавых гранат, святлошумавых. У іх там паніка — і мы галаву гэтую «адразаем» і іх затрымліваем. Такія спосабы мы адпрацоўваем. Але на гэты момант дрон — самая моцная, самая магутная зброя, не ўваходзячы ў кантакт, можна выканаць любую задачу любой складанасці. Гэта лятальны боепрыпас, які баражыруе і мае траекторыю палёту хітрэйшую, чым у таго ж «Джавеліна», і мы іх навучыліся выкарыстоўваць і будзем далей развіваць».
Карпянкоў дадаў, што «пасля таго, што адбылося (відаць, пасля дыверсіі ў Мачулішчах і верагоднай імітацыі падрыхтоўкі тэракта ў Гродне — НН), пасля ўсіх гэтых заклікаў па вяртанні і гэтак далей аддадзена каманда на зачысткі».
«У нас працуюць усе спецпадраздзяленні кожны дзень. «Рысь» трэніруецца і па адрасах затрымлівае. Цяпер «Беркут» працуе ў памежжы, каб ніводная мыш там не праскочыла, калі тут на хвост камусьці наступім, САХР увесь час працуе. Таму сілавікі атрымалі задачу і ўнутраныя войскі ў рамках спецаперацыі, якую праводзіць МУС па правядзенні зачысткі і навядзенні парадку, мы гэта робім», — сказаў ён.
«Мяркую, што да кантрольных дат мы навядзём парадак у нашай краіне. Грамадства наша будзе кансалідавана», — паабяцаў Карпянкоў, не назваўшы гэтыя «кантрольныя даты».
Мінчанка пакінула станоўчы водгук на сумку — і раптам выкрыла здраду чужога мужа19
Каментары