Беларуска набыла медыцынскі дыплом за 20 тысяч расійскіх рублёў. І нават уладкавалася на працу
У лютым 2023 года жанчына ўладкоўвалася на працу ў Гомельскі абласны клінічны кардыяцэнтр медсястрой. Прынесла дыплом, у якім напісана, што скончыла медкаледж па спецыяльнасці «Лячэбная справа». Калі працавала, начальства ўсумнілася, што дыплом сапраўдны.

Пры працаўладкаванні жанчына прадʼявіла нібыта дыплом Гродзенскага дзяржаўнага медыцынскага каледжа. У дакуменце пазначаная кваліфікацыя «Фельчар-акушэр. Памочнік лекара па амбулаторна-паліклінічнай дапамозе».
Калі ўзніклі сумневы ў кваліфікацыі працаўніцы, «дыплом» накіравалі экспертам. Тыя заключылі: бланк выраблены «не прадпрыемствам, якое ажыццяўляе вытворчасць прадукцыі гэтага віду».
Жанчына прызналася: у гродзенскім каледжы не вучылася, а дакумент замовіла ў інтэрнэце за 20000 расійскіх рублёў.
Распачатая крымінальная справа па арт. 380 КК РБ (падробка, выраб, выкарыстанне або збыт падробленых дакументаў, штампаў, пячатак, бланкаў).
Каментары