Кіт-бялуга па імені Хвалдзімір, якога ўпершыню выявілі чатыры гады таму ў Нарвегіі і западозрылі ў шпіянажы на карысць Расіі, апынуўся ў раёне ўзбярэжжа Швецыі — верагодна, ён шукае пару.
Больш за тры гады Хвалдзімір правёў ля нарвежскага ўзбярэжжа, пасля чаго ў апошнія месяцы раптам пачаў рухацца ў бок Швецыі. У нядзелю яго заўважылі ля паўднёва-заходняга шведскага ўзбярэжжа ў раёне населенага пункта Хунебастранд, піша «Еўрапейская праўда».
Марскі біёлаг з арганізацыі OneWhale Себасцьян Странд выказаў здагадку, што Хвалдзімір мог раптам адправіцца ў плаванне, бо шукае сабе пару або кампанію, бо бялугі — вельмі сацыяльны від.
Па словах Странда, кіту 13-14 гадоў, і ён знаходзіцца «ў такім узросце, калі яго гарманальны фон вельмі высокі». У той жа час бліжэйшая да Хвалдзіміра папуляцыя бялуг знаходзіцца на архіпелагу Шпіцберген, што на крайняй поўначы Нарвегіі.
У OneWhale занепакоеныя тым, што кіт, якога апошнія некалькі гадоў падкормлівалі людзі, мог развучыцца самастойна паляваць, і ўжо заўважылі некаторую страту ім вагі.
У 2019 годзе каля нарвежскіх вод рыбакі заўважылі кіта-бялугу, які пазней пасяліўся паблізу Хамерфеста. Яго даглядалі мясцовыя жыхары і ўлады. На жывёле тады заўважылі камеры, якія, як выявілі нарвежскія спецслужбы, былі ўсталяваныя для шпіянажу.
Лічыцца, што Хвалдзімір (гэта спалучэнне слова hval, якое на нарвежскай азначае «кіт», і імя Пуціна) быў часткай даследчай праграмы РФ па выкарыстанні кітоў для марскога шпіянажу.
Масква так і не апублікавала ніякай афіцыйнай рэакцыі на здагадку Нарвегіі, што бялуга была расійскім шпіёнам.
Баранцава мора, дзе знаходзіўся Хвалдзімір, — стратэгічны геапалітычны раён, дзе адсочваецца рух заходніх і расійскіх падводных лодак. Гэта своеасаблівыя вароты да Паўночнага шляху, які скарачае марскія падарожжы паміж Атлантычным і Ціхім акіянамі.
Цяпер чытаюць
У мінскім метро праходзяць выпрабаванні новыя цягнікі ФОТЫ2
Каментары