«Сыну прысудзілі тры гады ні за што, нягледзячы на праблемы са здароўем» — бацька
Брэсцкі абласны суд 28 чэрвеня разгледзеў крымінальную справу супраць берасцейца, спартоўца Дзмітрыя Белямука. Яго абвінавацілі па трох артыкулах Крымінальнага кодэкса: ч. 1 арт. 368 (абраза Лукашэнкі), арт. 369 (абраза прадстаўніка ўлады) і ч. 1 арт. 130 (распальванне расавай, нацыянальнай, іншай варожасці).
Працэс вяла суддзя Руслана Сянько, дзяржабвінаваўца — Аляксандр Бацюшка.
Паводле звестак «Берасцейскай вясны», мужчыну змясцілі пад варту ў сярэдзіне лютага 2023 года. Яго абвінавацілі за негатыўныя тэлеграм-каментары ў адрас Аляксандра Лукашэнкі, Наталлі Качанавай, а таксама за «абразу рускіх па нацыянальнай прыкмеце».
Пра прысуд выйшаў ролік на дзяржаўным тэлебачанні (у ім не называюць імя абвінавачанага, але абставіны падыходзяць пад справу Белямука). Там пракурор расказвае сутнасць абвінавачвання, што пра рускіх было напісана «абраза па нацыянальнай прыкмеце».
Таксама пракурор Бацюшка паведаміў, што па ўсіх трох артыкулах суд прысудзіў Дзмітрыю тры гады калоніі ва ўмовах агульнага рэжыму, а таксама штраф 3700 рублёў.
Тыя ж журналісты дзяржаўнага выдання, якія бралі каментар пракурора, знялі блізкіх Дзмітрыя Белямука на выхадзе з залы суда адразу пасля абвяшчэння прысуду.
Бацька Дзмітрыя, Аляксандр Белямук, заявіў што сыну прысудзілі тры гады «ні за што», нягледзячы на праблемы са здароўем («хворы, з чэрапам расколатым»).
«Гэтай справай нажылі яшчэ аднаго ворага, — кажа падчас здымак Аляксандр Белямук і дадае: — Чалавек, які выступаў супраць (маецца на ўвазе Раман Пратасевіч — заўв. рэд.), памілавалі яго, а ён што толькі не тварыў! Адзін раз выказаў чалавек, хворы, з чарапным расколатым — тры гады ўлупілі. За што, хлопцы? Хутка і па мяне прыйдуць, я ведаю. Я ўпэўнены, што прыйдуць. (…) Вы ўсё выдатна разумееце, што ёсць несправядлівасць. Ёсць. Але ўсе маўчаць. Адзін сказаў. Няправільна сказаў. Пакараць можна, але не так. Яго штрафам пакаралі. А тут яшчэ тры гады».
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым6
Каментары