Не скасаваныя! У Кіеўскім універсітэце кажуць, што не закрывалі беларускіх праграм

«Насуперак таму, што сказаў рэктар…»

Пра закрыццё беларускіх праграм заявіў 24 кастрычніка ў інтэрв'ю агенцтву «Украінскія навіны» рэктар універсітэта Уладзімір Бугроў.

Паводле яго, беларусістыку ў ВНУ перасталі вывучаць яшчэ ў 2022 годзе. Закрыццё беларускіх праграм ён згадаў у адным шэрагу са спыненнем навучання рускай мове і фарсі.

«Сапраўды, у нашым інстытуце філалогіі вывучалі рускую мову і літаратуру, беларускую мову і літаратуру, фарсі (персідскую). Летась мы закрылі гэтыя праграмы. Але гэта эмацыйны крок. Я абсалютна перакананы, што ў школе вывучаць рускую мову і літаратуру не трэба», — даводзіў рэктар Кіеўскага ўніверсітэта.

Прычын закрыцця беларускіх праграм ён не назваў. Пагутарыць з ім непасрэдна не ўдалося. А вось у інстытуце філалогіі яго заяву зняпраўдзілі.

Павялічыць

Паводле дырэктара інстытута Рыгора Семенюка, у 2022 годзе набор на беларусістыку не абвяшчаўся, бо «з-за спрыяння ўлады Беларусі злачыннай агрэсіі расіі (такое напісанне ў арыгінальным тэксце. — НН) супраць Украіны» прагназавалася, што да яе ў абітурыентаў не будзе інтарэсу.

«Але, насуперак таму, што сказаў рэктар КНУ прафесар Уладзімір Бугроў у згаданым вамі інтэрвʼю, у 2024 годзе Кіеўскі ўніверсітэт імя Тараса Шаўчэнкі плануе абвясціць чарговы набор на беларусістыку», — адпісаў «Нашай Ніве» прафесар Семянюк.

Па яго словах, ва ўніверсітэце ведаюць, што родная мова беларусаў — «сімвал барацьбы за незалежнасць, а дэмакратычна арыентаваная частка беларускага грамадства падтрымлівае Украіну ў супрацьстаянні з ворагамі, і багата беларусаў ваюе побач з украінцамі».

Прафесар Семянюк дадаў, што з 17 кастрычніка ва ўніверсітэце экспануецца выстава «З Украінаю ў сэрцы», прысвечаная беларусам, загінулым у барацьбе з расійскім агрэсарам.

Па беларускіх праграмах навучанне не спынялася 

Кіеўскі ўніверсітэт набірае студэнтаў на спецыялізацыю «Беларуская мова і літаратура, украінская мова і літаратура, англійская мова» з 2010 года.

Гэта адукацыйная праграма — унікальная, бо беларусістыка як асноўная дысцыпліна вывучаецца ва Украіне толькі ў Навучальна-навуковым інстытуце філалогіі.

Студэнтаў на яе набіраюць раз на два гады, а іх колькасць у акадэмічных групах вагаецца ад 4 да 10 чалавек, паколькі зацікаўленасць абітурыентаў праграмай не бывае стабільнай.

Павялічыць

У бягучым годзе вучацца 4 студэнты-беларусісты на бюджэтным навучанні 4 курса бакалаўрыята. Сёлета скончылі магістратуру 2 студэнткі.

«Магістарскія работы выпускніцы бліскуча абаранілі на пасяджэнні Дзяржаўнай экзаменацыйнай камісіі і атрымалі высокія балы з адзнакаю», — падкрэсліў Рыгор Семянюк.

Працягваюцца доследы, працуе Цэнтр імя Караткевіча

Прафесар Семянюк праінфармаваў, што ў інстытуце беларуская мова і літаратура застаецца аб’ектам навуковых даследаванняў і навукова-адукацыйных распрацовак.

Сёлета, напрыклад, быў апублікаваны навукова-метадычны дапаможнік «Найноўшая беларуская літаратура ва ўзаемаадносінах з украінскай літаратурай», распрацаваны дацэнтам кафедры славянскай філалогіі Аленай Паграбняк.

З 2009 года ў інстытуце філалогіі працуе Цэнтр беларускай мовы і культуры, якому ў 2012 годзе было нададзенае імя Уладзіміра Караткевіча. Ён зʼяўляецца вучэбна-метадычнай базай для падрыхтоўкі студэнтаў па адукацыйнай праграме «Беларуская і ўкраінская мовы і літаратуры і англійская мова».

Павялічыць

На працягу 20 гадоў у ім праводзяцца разнастайныя навуковыя, культурніцкія і прафарыентацыйныя мерапрыемствы. Сёлета Цэнтр стаў суарганізатарам сустрэчы з кіраўніцтвам «Цэнтра беларускіх камунікацый», на якой абмяркоўваліся пытанні падрыхтоўкі ва Украіне адмыслоўцаў-беларусістаў.

«Спадзяемся, што геаграфічная, культурная і гістарычная блізкасць, узаемападтрымка і ўзаемапаразуменне між нашымі народамі будуць апірышчам у супрацоўніцтве дэмакратычнай Беларусі і Украіны», — падсумаваў прафесар Рыгор Семянюк.

Кіеўскі ўніверсітэт імя Тараса Шаўчэнкі здавён звязаны з Беларуссю. У розныя гады ў ім вучыліся беларускі этнограф, адзін з заснавальнікаў нацыянальнай гістарыяграфіі Мітрафан Доўнар-Запольскі, класік беларускай літаратуры Уладзімір Караткевіч, а таксама беларускі гісторык Антон Ясінскі. Тут ладзяцца рэгулярна акцыі салідарнасці з беларускімі добраахвотнікамі і жалобныя імпрэзы па загінулых на фронце беларусах.

Глядзіце таксама:

Лаўрэат Нобелеўскай прэміі па фізіцы перадасць узнагароду ўкраінцам

У Кіеве адшукалі зніклы два гады таму помнік Жызнеўскаму, а беларускія добраахвотнікі аднавілі народны мемарыял суайчынніку

«Гэта быў чалавек тыпу Хокінга, якога перспектыва рана памерці змусіла зразумець, наколькі ж жыццё вартае таго, каб яго пражыць». Кім быў і як жыў Мікола Ермаловіч

• 8
• 0
• 1
• 0
• 0
• 0