Улады Баранавіцкага раёна не пажадалі ўсталяваць металічную інфармацыйную шыльду на месцы знакамітай Палонкаўскай бітвы, 350-годдзе якой будзе адзначацца сёлета.
Улады Баранавіцкага раёна не пажадалі ўсталяваць металічную інфармацыйную шыльду на месцы знакамітай Палонкаўскай бітвы, 350-годдзе якой будзе адзначацца сёлета.
Нагадаем, што напрыканцы мінулага года баранавіцкая інтэлігенцыя звярнулася да раённых уладаў з лістом, у якім прасіла дабраўпарадкаваць тэрыторыю вакол памятнага камня каля в. Палонка, а на самім помніку павесіць металічную шыльду з надпісам: «Тут 28 чэрвеня 1660 года аб’яднанае беларуска-літоўскае і польскае войска пад кіраўніцтвам гетманаў Паўла Сапегі і Стэфана Чарнецкага здабыла вялікую перамогу над утрая большым войскам маскоўскага ваяводы Івана Хаванскага падчас вайны Расіі і Рэчы Паспалітай абодвух народаў 1654-1667 гг.»
Памятны валун на месцы легендарнай бітвы быў усталяваны і асвечаны праваслаўным і каталіцкім святарамі яшчэ ў 1994 годзе. Драўляную шыльду з мемарыяльным тэкстам на ім сябры Баранавіцкай Рады ТБМ усталёўвалі ўжо двойчы, але яе неўзабаве знішчалі вандалы.
Таму напярэдадні 350-годдзя той слаўнай перамогі пад Палонкай сябры ТБМ вырашылі звярнуцца да мясцовых уладаў з просьбай адзначыць векапомнае месца менавіта металічнай шыльдаю.
Па словах старшыні Баранавіцкай Рады ТБМ Віктара Сырыцы, гэта быў бы ўдзячны жэст нашчадкаў, якія памятаюць сваю гісторыю і якія пазбавіліся комплексаў «малодшага брата» ў яе ацэнках.
Аднак з адказу Баранавіцкага райвыканкама можна зрабіць выснову, што падобнага жэсту зроблена не будзе: «Фінансавыя сродкі на ўсталяванне металічнай пліты з інфармацыяй пра падзеі на гэтым месцы не прадугледжаныя ў раённым бюджэце на 2010 год, бо дадзены памятны знак не з’яўляецца помнікам гісторыі і культуры».
Пакуль месца Палонкаўскай бітвы, перамога ў якой мела выключнае значэнне ў вызваленні нашай краіны ў гады самай жудаснай вайны ў беларускай гісторыі, так і застанецца безыменным. Да лепшых часоў.
Каментары