Лаўрэата прэміі «Беларускі спартыўны Алімп» судзяць за сэксуальны гвалт
Гомельскаму трэнеру пагражае ад 5 да 13 гадоў зняволення, калі яго віна ў судзе будзе даказана.
У Гомелі 10 снежня пачынаецца разгляд крымінальнай справы па абвінавачванні ў распусных дзеяннях (арт.169 КК) і гвалтоўных дзеяннях сэксуальнага характару (арт. 167 КК). Прозвішча, імя абвінавачанага па гэтай справе, якія пазначаны ў раскладзе суда, цалкам супадаюць з дадзенымі вядомага гомельскага трэнера Віктара Байкова.
«Флагшток» патэлефанаваў па месцы яго працы — пытанню пра суд над сваім супрацоўнікам там не здзівіліся, адзначыўшы, што не ведаюць, калі пачнуць разглядаць справу трэнера.
Байкоў не раз станавіўся героем публікацый у дзяржаўнай прэсе. Апошні раз — у пачатку 2023 года, калі стаў уладальнікам прэміі «Беларускі спартыўны Алімп» па выніках 2022 года.
Гэта заслужаны трэнер Беларусі, які ўжо 40 гадоў працуе ў Гомельскім дзяржаўным вучылішчы алімпійскага рэзерву. Сярод яго выхаванцаў ёсць прызёры Алімпійскіх гульняў.
Трэнера абвінавачваюць па частцы 2 абодвух артыкулаў. Згодна з фармулёўкамі ў Крымінальным кодэксе, гэта распусныя дзеянні ў дачыненні да асобы, што заведама не дасягнула 16-гадовага ўзросту, учыненыя з ужываннем гвалту або з пагрозай яго прымянення, альбо педагагічным работнікам або іншай асобай, на якога ўскладзены абавязкі па выхаванні непаўналетняга.
Другое абвінавачванне гучыць так: дзеянні сэксуальнага характару, учыненыя насуперак волі пацярпелага з ужываннем гвалту або з пагрозай яго прымянення, учыненыя паўторна, альбо ў дачыненні да заведама непаўналетняга (непаўналетняй).
Вядома, што да трэнера траплялі дзеці ва ўзросце ад 13 гадоў.
Пра злачынствы якога перыяду ідзе гаворка, невядома — справа будзе разглядацца ў закрытым рэжыме, таму ніякія падрабязнасці не агучаць. Нават пра факт суда і пра гэтую гучную справу ў дзяржаўнай прэсе не было згадана.
У выпадку прызнання вінаватым трэнера могуць прысудзіць да пазбаўлення волі на тэрмін ад пяці да трынаццаці гадоў.
Як Байкоў раней распавядаў пра сябе ў інтэрв'ю, ён больш за 40 гадоў у шлюбе, мае некалькі ўнукаў.
Каментары