Пенсіянерка з Гродна зарабіла 10 даляраў, а страціла 80 тысяч рублёў
У кастрычніку 73-гадовая жанчына ўбачыла ў сетцы рэкламу пра заробак на біржы. Жанчыну зацікавіла прапанова, і яна пакінула заяўку, паведамляе прэс-служба міліцыі.
Імгненна з ёй звязаўся мужчына, які прадставіўся супрацоўнікам брокерскай кампаніі, прапанаваў узяць удзел у таргах. Ён паведаміў, што за ёй будзе замацаваны персанальны менеджар, які дапаможа ва ўсім разабрацца.
У той жа дзень патэлефанавала дзяўчына і патлумачыла, што задача новага гульца заключаецца толькі ў тым, каб інвеставаць. Зрабіўшы першы перавод, жанчына ўбачыла, што сума адлюстравалася на платформе. Пасля гэтага пад кантролем настаўніка яна зарабіла $10, і грошы ў той жа дзень былі пераведзены на яе картку.
Менавіта ў гэты момант яна паверыла, што такім чынам сапраўды можна зарабіць.
Больш за месяц жанчына выконвала ўсе патрабаванні махляроў. Па іх указанні яна паставіла праграму дыстанцыйнага доступу, праз якую яе нібыта навучалі працы на біржы. За гэты час даверлівая гродзенка перавяла на розныя рахункі, якія належалі зламыснікам, амаль 80 тыс. рублёў.
Калі сума на балансе склала каля $20 тыс., пенсіянерцы прапанавалі вывесці грошы. Пры гэтым з асабістага кабінета сродкі нібыта перавялі ў брытанскі, а затым у швейцарскі банкі. Жадаючы ўдакладніць магчымасць вываду сродкаў, пенсіянерка звярнулася ў адну з фінансавых установаў Гродна. Спецыялісты банка зразумелі, што жанчына стала ахвярай ашуканцаў, і парэкамендавалі звярнуцца ў міліцыю.
Хтосьці стварыў фальшывы сайт КДБ і цішком збіраў даносы1
Каментары