Польшча паведаміла аб 10-разовым скарачэнні колькасці нелегальных мігрантаў на мяжы з Беларуссю
Прэм'ер-міністр Польшчы Дональд Туск заявіў аб значным скарачэнні колькасці нелегальных перасячэнняў усходняй мяжы краіны. Паводле яго слоў, узмацненне візавай палітыкі і ўвядзенне абмежаванняў на права прытулку дазволілі дасягнуць такіх вынікаў, піша Most.
«Мы ўзмацнілі нашу візавую палітыку і, найперш, вырашылі прыпыніць дзеянне права на прытулак усюды, дзе мы маем справу з масавымі перасячэннямі мяжы, арганізаванымі Беларуссю і Расіяй. І сёння ўсходнюю мяжу Польшчы перасякае ў 10 разоў менш нелегальных мігрантаў, чым да ўвядзення нашых абмежаванняў», — заявіў Туск.
Паводле інфармацыі Падляшскага аддзялення Памежнай службы Польшчы, у 2024 годзе польскія памежнікі зафіксавалі 30 тыс. спроб нелегальнага перасячэння мяжы супраць 26 тыс. годам раней. Рэкорд быў усталяваны ў маі (7 тыс. спроб), тады колькасць спроб даходзіла да 400 у дзень.
Пасля гэтага з 13 чэрвеня Польшча ўвяла буферную зону на шэрагу ўчасткаў мяжы. Гэтыя меры аказаліся эфектыўнымі: у другой палове года колькасць спроб нелегальна трапіць у Польшчу з тэрыторыі Беларусі значна зменшылася ў параўнанні з першай.
13 студзеня 2025 года Польшча не зафіксавала ніводнай спробы нелегальнага пранікнення мігрантаў з тэрыторыі Беларусі. У апошні раз «нулявая» статыстыка была адзначана 9 студзеня, а 7 і 8 студзеня колькасць выяўленых спроб не дасягала і 10 у дзень.
Стала вядома, што за амерыканец нядаўна быў вызвалены з беларускай турмы7
Каментары