«Маскоўскі камсамолец»: Як-42 разбіўся праз тое, што пілоты забыліся адключыць стаянкавы тормаз
Газета спасылаецца на крыніцу ў авіяпраме, «блізкую да расследавання».
Катастрофа самалёта Як-42 з хакеістамі «Лакаматыва» на борце адбылася праз тое, што пілоты забыліся адключыць стаянкавы тормаз,
піша «Маскоўскі камсамолец».
Выданне сцвярджае, што камісія, якая расследуе трагедыю, ужо высветліла, што самалёт пачаў разгон па ўзлётна-пасадачнай паласе з нявыключаным стаянкавым тормазам. Гэтая прылада — аналаг ручнога тормазу ў аўтамабілі — выкарыстоўваецца толькі падчас стаянкі. Магутнасці рухавікоў цалкам хапае, каб паветранае судна кранулася з месца, знаходзячыся на стаяначным тормазе (гэтак жа, як некаторыя неабачлівыя аўтамабілісты пачынаюць рухацца на «ручніку») і праехала па рулёжнай дарожцы на ўзлётна-пасадачнай паласе. А вось разагнацца да ўзлётнай хуткасці ўжо робіцца праблематычна.
Акрамя таго, крыніца паведаміла газеце, што, як вынікае з расшыфроўкі самапісцаў Як-42, непасрэдна перад узлётам камандзір паветранага судна Андрэй Саломенцаў загадаў другому пілоту Ігару Жэвелаву ўзяць кіраванне на сябе, матывуючы гэта дрэнным самаадчуваннем.
Стаянкавы тормаз павінен быў адключыць менавіта камандзір. Але, магчыма, у момант перадачы кіравання пілоты пра яго проста забыліся і не звярнулі ўвагу на адпаведны сігнал на прыборнай панелі (гукавым сігналам ён не дублюецца), піша выданне.
Як-42 разбіўся 7 верасня ў Яраслаўскай вобласці. З 45 чалавек, якія знаходзіліся на борце, выжыў толькі бортінжынер Аляксандр Сізоў. Усе хакеісты і супрацоўнікі клуба загінулі.
Каментары