Статкевіча-старэйшага павіншавалі з Новым годам
Віктар Паўлавіч спадзяецца на Бога і добрых людзей і вельмі верыць, што дачакаецца вызвалення свайго сына.
1 студзеня баранавіцкія актывісты наведалі Віктара Паўлавіча Статкевіча — бацьку экс-кандыдата ў прэзідэнты Мікалая Статкевіча. Статкевіч-старэйшы мае 85 гадоў і жыве адзін у мікрараёне Паўночны горада Баранавічы.
Старшыня Баранавіцкай Рады Таварыства беларускай мовы Віктар Сырыца паведаміў, што прадстаўнікі дэмакратычных партый і арганізацый горада з’яўляюцца частымі гасцямі Статкевіча-старэйшага.
— Але 1 студзеня мы былі абавязаны маральна падтрымаць гэтага чалавека і павіншаваць яго з Новым годам. Гаварылі не толькі пра цяжкае цяперашняе сацыяльна-эканамічнае становішча ў краіне і свеце, але і пра ўсіх палітзняволеных краіны, пра іх магчымае вызваленне ў 2012 годзе.
Віктар Паўлавіч спадзяецца на Бога і добрых людзей і вельмі верыць, што дачакаецца вызвалення свайго сына.
***
Экс-кандыдат у прэзідэнты Мікалай Статкевіч быў арыштаваны год таму, 19 снежня 2010 г. Асуджаны на 6 гадоў калоніі ўзмоцненага рэжыму, утрымліваецца ў Шклоўскай калоніі. Неаднаразова падвяргаецца прэсінгу.
Паводле яго жонкі Марыны Адамовіч, 12 студзеня над Статкевічам-малодшым мае прайсці суд, каб зрабіць больш жорсткім пакаранне за нібыта рэгулярныя парушэнні турэмнай дысцыпліны. «Мяркую, яго адправяць ў Магілёўскую крытую турму ўжо 13 студзеня, бо якраз на гэты дзень туды прызначаны этап», — кажа Марына Адамовіч.
Каментары