Лукашэнка пахваліў пасла Ізраіля

Аляксандр Лукашэнка чакае асобнай пазіцыі ў дачыненні да Беларусі з боку новага пасла Ізраіля Іосіфа Шагала, нягледзячы на некаторыя саюзніцкія абавязацельствы гэтай краіны. Пра гэта прэзідэнт заявіў 20 лютага, прымаючы даверчыя граматы ў ізраільскага дыпламата.

Ізраіль, падкрэсліў Лукашэнка, займае асобнае месца ў знешняй палітыцы Беларусі. «Там жывуць сотні тысяч выхадцаў з нашай краіны і іх нашчадкі. Для нас вельмі прыемна, што яны з цеплынёй ставяцца да беларускага народа.

У сваю чаргу, мы лічым іх сваімі людзьмі.

«Наша краіна адкрытая для нарошчвання інвестыцыйнага і навукова-тэхнічнага супрацоўніцтва з Ізраілем як з адным з сусветных лідараў у развіцці высокатэхналагічных вытворчасцяў», — падкрэсліў Лукашэнка.

Ён выказаў падзяку Іосіфу Шагалу за пазіцыю, якую той займае ў дачыненні да Беларусі. «Я вельмі спадзяюся, нават нягледзячы на цесныя саюзніцкія адносіны (Ізраіля.) з некаторымі дзяржавамі, што Беларусь усё ж будзе займаць асобнае месца не толькі ў вашым сэрцы як пасла, ведаю, што вам ад гэтага нікуды не дзецца. Я чуў ваша інтэрв’ю адной з нашых тэлекампаній.

Я гатовы падпісацца практычна пад усім, што вы сказалі. Агульны лейтматыў і пазіцыя заслугоўваюць павагі. Мне здаецца, што мы будзем мець пасла Ізраіля ў Беларусі з нейкім не толькі асобным поглядам, але і асобнай пазіцыяй»,

***

У мінулыя выхадныя ў інтэрв’ю тэлеканалу СТВ, адказваючы на пытанне, ці падтрымлівае Ізраіль санкцыі ў дачыненні да Беларусі з боку ЗША і ЕС, Шагал заявіў: «Не. Мы галасуем. А калі гаворка ідзе пра галасаванне ў ААН, мы галасуем разам з нашымі саюзнікамі. Гэтак жа, як вы галасуеце разам з Расійскай Федэрацыяй. Тут усё нармальна. Тут парытэт. Мы не ініцыюем такога роду рэчы. Вы зразумейце. Гэта вельмі важны момант. Вельмі важна зразумець, я тлумачу гэта не адзін раз, і штораз па-новаму. Што важна для Ізраіля, найперш калі мы гаворым пра наладжванне ўзаемаадносін з той ці іншай краінай? Першае пытанне — ці ёсць на тэрыторыі гэтай дзяржавы яўрэі? Другое пытанне — як ставіцца мясцовая ўлада да яўрэяў, да іх традыцый, да іх культуры, да захавання памяці і гэтак далей? Калі гэтыя два фактары прысутнічаюць, маюць месца, і тут усё ў парадку, усё астатняе — гэта ўжо пытанне тэхнічнае: ёсць пра што гаварыць. Мы можам дамовіцца заўсёды — мы ж людзі».

Шагал падкрэсліў: Ізраіль не лічыць, што пытанні аб санкцыях «неабходна педаляваць». «Гэта значыць калі прад’яўляць нейкія пэўныя патрабаванні, калі патрабуюць саюзніцкія абавязацельствы, значыць, мы будзем галасаваць за гэту тэму, калі гэта не супярэчыць нашым інтарэсам. Але мы не з’яўляемся ініцыятарам такога роду акцый», — заявіў ён СТВ.

15 лютага на сваёй першай прэс-канферэнцыі ў Мінску новы пасол Ізраіля на пытанне БелаПАН заявіў, што не ведае пра наяўнасць у Беларусі палітзняволеных. «Я — грамадзянін Ізраіля, у нас няма палітзняволеных. Што датычыць Беларусі, то я не ведаю, мне трэба пачытаць газеты. Праз паўгода я адкажу на ваша пытанне. Я журналіст і выдатна ведаю, як пішуцца артыкулы. Вы самі бывалі ў лагерах для палітзняволеных?» — пацікавіўся дыпламат у журналісткі.

Гэта заява атрымала шырокі грамадскі рэзананс.

• 0
• 0
• 0
• 0
• 0
• 0
• 0
• 0