Начны драг: як праходзяць нелегальныя гонкі ў Мінску
Кожны чацвер і суботу, калі дазваляе надвор'е, «пасвячоныя» маладыя людзі з'язджаюцца ў прамзону за МКАД.
Звычайным вечарам пасля 18:00 тут наўрад ці можна сустрэць хоць нейкае ажыўленне. Але толькі не ў дні гонак. 100–150 аўтамабілістаў і як мінімум столькі ж гледачоў прыязджаюць сюды на бясплатнае, хоць і не зусім легальнае відовішча — драг на вуліцах сталіцы.
«У нас усё проста, — запэўніваюць арганізатары. — У адрозненне ад іншых клубаў, мы адкрытыя для ўсіх і ставімся з павагай да кожнага. І няважна, прыедзеце вы на „капейцы“ ці Corvette, пачатковец вы або прафесіянал. Тут вы можаце атрымаць дозу адрэналіну або паглядзець збоку, у якасці гледача, падтрымаць свайго сябра, пазнаёміцца з гоншчыкамі, знайсці аднадумцаў і новых сяброў».
Мы прыбылі на месца правядзення гонак бліжэй да 22:00. Драг праводзяць на «сляпой» вуліцы, што ўпіраецца ў тупік. Рух не перакрываюць — перыядычна спаборніцтвам «перашкаджалі» грузавікі, аўтобусы і легкавушкі тых, хто «не ў тэме».
«Запомніць правілы нескладана: стартуюць дзве машыны, — сустрэў нас Уладзімір, адзін з арганізатараў. — Сапернікі самі знаходзяць адно аднаго.
Хтосьці проста для забавы едзе на „Жыгулях“ супраць Chrysler з6-літровым маторам. Іншыя шукаюць саперніка з роўным аб’ёмам рухавіка, часам спрачаюцца на грошы».
На старт — ён жа пешаходны пераход, адзначаны фішкай дарожных будаўнікоў, — выязджае першая пара машын. Вядоўца праз мегафон просіць вызваліць трасу ад аўтамабіляў, патрабуе сысці з праезнай часткі гледачоў і нарэшце дае каманду хлопцу, які падае сігналы удзельнікам. Той па чарзе паказвае на кіроўцаў, яны ківаюць на знак гатоўнасці. Малады чалавек падымае рукі ўверх і рэзка апускае іх. Равуць маторы, вішчаць шыны. Пад апладысменты і крыкі гледачоў аўтамабілі імчаць наперад. Ім трэба пераадолець 402 метры па простай лініі. Натуральна, хто першы — той і выйграў. Адзін старт мала чым адрозніваецца ад іншага. Змяняюцца толькі кіроўцы і машыны. Мяркуючы па рэакцыі гледачоў, усе добра ім знаёмыя.
Не праходзіць і 30 хвілін, як натоўп пачынае хаатычна перамяшчацца. Хтосьці выгукнуў: «Мянты!» На машыне міліцыі загараюцца пробліскавыя маячкі. Супрацоўнік ГУУС без эмоцый загадвае праз гучнагаварыцель: «Заканчваем, раз’язджамся». Міліцыянт з аўтамабіля не выходзіць — ніякіх штрафаў сёння не будзе. «Перыядычна ловяць
Другое месца дыслакацыі знаходзіцца за некалькі кіламетраў, ужо з іншага боку МКАД. Тут рух крыху больш ажыўлены — часцей праязджаюць маршрутныя аўтобусы, легкавушкі гараджан. Часам вядоўцу даводзіцца адкладаць старт на некалькі хвілін, пакуль усе праедуць. Хтосьці з удзельнікаў не вытрымлівае: «Давай сігнал! Яны доўга так будуць ездзіць!» Арганізатар ігнаруе нецярплівую заўвагу — імкнецца думаць не толькі пра весялосць, але і пра бяспеку.
«Раней мы яшчэ выстаўлялі загароду са стужак па абодва бакі „трасы“, каб людзі не лезлі пад колы, — кажуць арганізатары. — Але неўзабаве нас пачалі ганяць супрацоўнікі ДАІ і міліцыі, мы перасталі гэта рабіць. Няшчасных выпадкаў, на шчасце, не было. Дарэчы, у свой час мы спрабавалі дамовіцца з Дзяржаўтаінспекцыяй: перакрываць вуліцу, ставіць агароджу, ганяць пад наглядам інспектараў. Але там нічога выразнага не адказалі: маўляў, стварэнне аварыйнай сітуацыі, неарганізаваны сход і г. д.».
Ніхто не спяшаецца раз’язджацца, у тым ліку і гледачы. Іх заўсёды ў некалькі разоў больш, чым удзельнікаў. Большасці з тых, хто прыехаў проста паглядзець, не больш за 30 гадоў. Драг прыцягвае не толькі хлопцаў. Тут можна сустрэць шмат дзяўчат: адны склалі кампанію сваім маладым людзям, іншыя відавочна знаходзяцца ў актыўным пошуку. Для многіх гэтыя гонкі — адчуванне забароненай забаўкі з уласцівай атрыбутыкай: напоямі, півам, чыпсамі і семкамі. Для кагосьці такі адпачынак стаў альтэрнатывай стандартным паходам у кіно і вячэрам у кавярні.Гонкі працягваюцца і пасля паўночы.
Глядзі таксама: У начным падполлі: нелегальныя гонкі ў Мінску -- фотарэпартаж Сяргея Гудзіліна
Каментары