Chronika

25.11.2005 / 13:00

Aŭtuchovič prahaładaŭ 40 dzion

Pradprymalnik Mikałaj Aŭtuchovič praciahvaje haładoŭku ŭ haradzienskaj turmie (na fota). U Vaŭkavysku da haładoŭščykaŭ, salidarnych z Aŭtuchovičam, 16 listapada dałučyŭsia pradprymalnik Anatol Dzieška, 19-ha — kiroŭca Źmicier Linkievič. Ahułam u padtrymku Aŭtuchoviča haładajuć užo siamiora čałaviek.

❏

La polskaj miažy

Namieśniku staršyni SPB Juzafu Pažeckamu 14 listapada anulavali dazvolny štamp u pašparcie. Namieśniku staršyni SPB Viesłavu Kieŭlaku zrabili toje samaje 18 listapada.

Anžaliku Borys 16 listapada trymali na dopycie niekalki hadzin. Na paŭtornym dopycie 17 listapada jaje vinavacili ŭ niasłušnym vykarystańni sponsarskaj dapamohi na nastaŭnickaj kanferencyi 27 listapada 2004 h. Ale Sajuzam palakaŭ tady kiravaŭ T.Kručkoŭski.

Redaktar časopisu «Magazyn Polski» Andrej Pačobut 17 listapada pryjechaŭ u Polšču, chacia dazvolny štamp u jaho pašparcie skasavany. Žurnalist dabiraŭsia praz Ukrainu. U Polščy jon sustreŭsia z premjer-ministram Kazimiežam Marcinkievičam. Pry viartańni ŭ Biełaruś 19 listapada na biełaruskaj miažy pašpart u jaho adabrali. Razam z Pačobutam zatrymali Miečysłava Jaskieviča, ale nieŭzabavie vypuścili.

U Baranavičach

Napiaredadni pryjezdu Alesia Milinkieviča ŭ Baranavičy staršyniu filii niezarehistravanaha «Maładoha frontu», studenta BarDU Sieržuka Marčyka vyklikali ŭ dekanat: kiraŭnictva ŭniversytetu raspytvała chłopca pra raspaŭsiud niedziaržaŭnych vydańniaŭ dy pahražała składanaściami ŭ vučobie dy prablemami ŭ baćkoŭ na pracy.

U Babrujsku šukajuć vinavatych

Lideraŭ babrujskaj filii «MF» Valera Mackieviča i Charytona Bondara 12 listapada vyklikali na dopyt u prakuraturu: śledčyja šukajuć, chto 7 listapada abliŭ pomniki Leninu aranžavaj farbaj.

Levanieŭski haładaje

Palitviazień Valer Levanieŭski 13 listapada abviaściŭ haładoŭku: jamu zabaraniajuć sustrakacca sa svajakami, zabrali asabistuju pierapisku. Levanieŭski taksama patrabuje adchilić ad pracy namieśnika načalnika Ivacevickaj kalonii pa režymna-aperatyŭnaj rabocie Karmanoviča, jaki ciapier časova vykonvaje abaviazki načalnika kalonii.

U Viciebsku

Staršyniu biełaruskaj filii mižnarodnaj arhanizacyi «Amnesty International» Viačasłava Bortnika zatrymali na vakzale ŭ Viciebsku 13 listapada: u jaho kanfiskavali dakłady j materyjały hetaj pravaabarončaj arhanizacyi.

U Śvietłahorsku: dva dopyty za dzień

Aktyvista TBM sa Śvietłahorsku Vadzima Bohdana 15 listapada vyklikali ŭ milicyju dla pakazańniaŭ pa materyjałach pieratrusu milicyjantami jahonaj kvatery. Padčas zapisu pakazańniaŭ śledčy skazaŭ, što budzie jašče adzin pieratrus — «dla pošuku samahonu». Pravieści pieratrus milicyjantam pieraškodziła prysutnaść pradstaŭnikoŭ hramadzkich abjadnańniaŭ.

Pa abiedzie chłopca paŭtorna vyklikali ŭ milicyju: jaho źvinavacili ŭ pieravozie niezarehistravanaj drukavanaj pradukcyi (biuleteń «16»).

U Viciebsku prarvała trubu

Administracyja Viciebskaha dziaržaŭnaha ŭniversytetu 16 listapada admianiła kruhły stoł «Moładzievaja palityka ŭ Respublicy Biełarusi», inicyjavany moładzievym centram «Spadčyna». Aficyjnaja pryčyna admovy — «prarvała trubu».

Maciuki ŭ Homieli

Aktyvistaŭ niezarehistravanaj arhanizacyi «Zubr» Paŭła Madšaru j Rusłanu Hłazkovu 15 listapada zatrymali ŭ Homieli napiaredadni Dnia salidarnaści. Pry zatrymańni milicyjanty, pa słovach zubroŭcaŭ, maciukalisia j abražali zatrymanych.

Sudy «Narodnaj voli»

Mienski haradzki haspadarčy sud 17 listapada pastanaviŭ, što hazeta «Narodnaja vola» maje prava drukavacca ŭ drukarni «Čyrvonaja zorka». Adnak pazovy vydańnia da «Mienharsajuzdruku», «Mienskabłsajuzdruku» j «Biełsajuzdruku» nakont raspaŭsiudžvańnia hazety nie zadavoleny. Dyrektar RUP «Biełsajuzdruk» Michaił Padhajny zajaviŭ, što padpisvaŭ dadatkovaje pahadnieńnie z hazetaj, jakoje dazvalała skasavać damovu ŭ adnabakovym paradku, kali parušajecca zakanadaŭstva ab druku. «Narodnaja vola» pra takoje pahadnieńnie pačuła tolki ŭ sudzie.

Masavyja zatrymańni ŭ Mahilovie

U Mahilovie pierad pryjezdam Łukašenki 17 listapada milicyjanty zatrymali kala 30 aktyvistaŭ «Zubra». Zatrymlivali ŭsich, chto chacia b raz prachodziŭ pa administracyjnych spravach. Vaładara Curpanava zabrali z ułasnaj kvatery ŭ RAUS «dla prafilaktyčnaj razmovy». Jaho pradstaŭniku Barysu Buchielu nie dazvolili prysutničać na razmovie. Praz adpuščanyja zakonam try hadziny Curpanava nie adpuścili, a stali dapytvać «u jakaści śviedki». Z ułasnaj kvatery zabrali Ŭłada Ženiesku. Mašynu Andreja Pałudy, jaki jechaŭ ź Jaŭhienam Suvoravym, zatrymali ŭviečary 16 listapada: «zubroŭcaŭ» abvinavacili ŭ drobnym chulihanstvie. Sami chłopcy śćviardžajuć, što inspektar spyniŭ mašynu, kali ŭbačyŭ na zadnim škle nalepku z vyjavaj «Pahoni».

Ułada nia słuchaje REP

Ministerstva justycyi 17 listapada adterminavała rehistracyju źmienaŭ i dapaŭnieńniaŭ u statut Prafsajuzu rabotnikaŭ radyjoelektronnaj pramysłovaści (REP). Novaja redakcyja statutu była pryniataja ŭ vieraśni na VII źjeździe arhanizacyi, ale Minjust vyrašyŭ dadatkova pravieryć pravamocnaść źjezdu: chacia pradstaŭnikoŭ ministerstva aficyjna zaprašali, udziełu ŭ schodzie jany nia brali.

Barysaŭski harvykankam 17 listapada admoviŭsia rehistravać struktury prafsajuzu REP na AAT «Barysaŭskaje pradpryjemstva muzyčnych instrumentaŭ».

Nastup na hazety

Ministerstva infarmacyi pazbaviła rehistracyi niedziaržaŭnuju hazetu «Mołodiežnyj prośpiekt». Padstava — dva prypynieńni ciaham hodu, paśla čaho hazeta nie prajšła pierarehistracyi. Pra druhoje prypynieńnie ŭ vieraśni zasnavalnik hazety Ŭładzimier Navasiad daviedaŭsia tolki ciapier.

Rajonny vuzieł paštovaj suviazi 18 listapada paviedamiŭ niedziaržaŭnaj hazecie «Borisovskije novosti», što nia budzie padpisvać damovu na raspaŭsiud na pieršaje paŭhodździe 2006 h.

Redakcyja niedziaržaŭnaj hazety «Navinki» 18 listapada abviaściła, što maje sudzicca ź Ministerstvam infarmacyi, bo atrymała paviedamleńnie pra anulavańnie rehistracyi. Redakcyja ličyć skasavańnie niepravamiernym, bo nie prajšoŭ jašče adzin hod z času vychadu apošniaha numaru hazety.

Labiedźku ŭsio nadhladajuć

U Nacyjanalnym aeraporcie «Miensk» lidera AHP Anatola Labiedźku zatrymali na niekalki hadzin dla asabistaha nadhladu: adpuściŭšy tolki apoŭnačy.

21 listapada jaho vyklikali ŭ prakuraturu: śledčych cikaviŭ materyjał ab prakuratury, raźmieščany na sajcie www.ucpb.org 2 listapada.

Papiaredžańnie «Vietraziu»

Moładzievaje HA «Vietraź» sa Słonimu atrymała 21 listapada papiaredžańnie ad upraŭleńnia justycyi Haradzienskaha abłvykankamu. Arhanizacyi zakidajuć adsutnaść dakumentu, jaki b śviedčyŭ pra najaŭnaść juradrasu, niezarehistravanuju symboliku j niedakładnuju dakumentacyju 2000—2004 h.

Štraf za raspaŭsiudžvańnie

Maryju Bahdanovič u Homieli 21 listapada aštrafavali na siem bazavych vieličyniaŭ (203 tys.) za raspaŭsiud hazety «Tovariŝ».

AŠ