Čym «bitły» zajmalisia paasobku? - videa i aŭdyjo

Siońnia — mižnarodny dzień The Beatles

16.01.2013 / 15:24

16 studzienia 1957 hoda adkryŭsia kłub Cavern, u jakim kaliści debiutavali The Beatles. Z hetaj nahody JUNESKA abvieściła 16 studzienia Mižnarodnym dniom The Beatles. Banalna było b u honar śviata pastavić štości kłasična-bitłoŭskaje. My vyrašyli ŭzhadać pieśni kožnaha z «bitłoŭ», napisanyja paśla taho, jak znakamitaj čaćviorki nie stała.

Džon Lenan — Mother

Paśla raspadu The Beatles Džon Lenan zapisaŭ adzin z samych zmročnych albomaŭ u historyi rok-muzyki — Plastic Ono Band. Uvieś albom — heta minimalistyčnaja refleksija pra były hurt, kachańnie da Joki Ona, adsutnaść dziacinstva i svajo miesca ŭ śviecie. Adkryvaje albom pieśnia Mother, mahčyma, samy praniźlivy tvor, napisany Lenanam.

Poł Makartni — Maybe I'm Amazed

Makartni, abvinavačany ŭsimi i kožnym u razvale hurtu, zapisaŭ pieršy albom sam — prosta ŭ siabie doma, syhraŭšy na ŭsich instrumientach, i praśpiavaŭšy ŭsie vakały. Albom pad prostaj nazvaj McCartney, vidać, samy kamierny ŭ dyskahrafii sera Poła.

Džordž Charysan — Wah-Wah

A voś Džordž Charysan raźviarnuŭsia napoŭnicu — adrazu vydaŭ patrojny albom, prajhraŭ u sudzie spravu nakont płahijatu, adrazu zapisaŭ jašče adzin albom i pravioŭ kancert u dapamohu Banhładeša (ź jakoha atrymaŭsia, jašče adzin albom). U časy The Beatles było zrazumieła, što ŭ Charysana vialiki patencyjał, jaki hitaryst całkam zmoh realizavać tolki paśla raspadu hurtu.

Rynha Star — I'm The Greatest

Rynha byŭ adzinym, chto nie papsavaŭ stasunkaŭ z byłymi kalehami, u vyniku jany (što praŭda, paasobku) sabralisia na jahonym albomie Ringo. Džon Lenan napisaŭ pieśniu I'm The Greatest dla siabie, ale vyrašyŭ addać jaje Rynha — tak oda samazakachanaści pieraŭtvaryłasia ŭ zabaŭnuju pop-piesienku.

The Beatles — Free as a Bird

Paśla śmierci Džona Lenana astatnija «bitły» sabralisia razam i zapisali pieśniu Free as a Bird, zrabiŭšy z akustyčnaha dema Lenana apošni vialiki tvor vialikaha hurtu.

Juraś Uskoŭ