Халіп заяўляе, што пасля словаў Лукашэнкі кантроль над ёй узмацніўся

Два дні запар да журналісткі прыходзіць міліцыя.

17.01.2013 / 16:41

«Глядзяць, ці не збегла я, як некалі казаў Лукашэнка, «вечерней лошадью», — кажа Ірына.

Міліцыянты прыходзілі да яе ў аўторак і сераду пасля 22 гадзін: менавіта з гэтага часу і да раніцы Ірына Халіп не можа пакідаць кватэры.

«Адзін-два разы на тыдзень прыходзілі звычайна. Але каб запар, не было. Нейкае ноу-хау. Я заўважыла сувязь.

Як толькі Лукашэнка выказваецца, дык адразу кантроль усталёўваецца жорсткі», — сцвярджае Халіп.

Падчас прэс-канферэнцыі 15 студзеня Аляксандр Лукашэнка заявіў, што Ірына Халіп адмовілася выехаць з Беларусі. У той жа час, журналістцы забаронены выезд з краіны па рашэнні суда.