Śledčy kamitet zaviaršaje rasśledavańnie kryminalnaj spravy ab biełaruskim filijale MMM

U niezakonnaj pradprymalnickaj dziejnaści abvinavačvajucca šeść čałaviek.

25.01.2013 / 10:20

Śledčy kamitet zaviaršaje rasśledavańnie kryminalnaj spravy ab biełaruskim filijale MMM, paviedamiŭ staršynia Śledčaha kamiteta Valancin Šajeŭ 24 studzienia na pres-kanfierencyi ŭ Minsku.

Jon nahadaŭ, što sprava raspačata pa artykule ab niezakonnaj pradprymalnickaj dziejnaści (art. 233 KK).

Pavodle słoŭ Šajeva, na siońnia abvinavačańnie vystaŭlena šaści asobam. «Adna asoba znachodzicca pad vartaj, troje — pad załoham i da dźviuch asob prymieniena miera strymańnia ŭ vyhladzie damašniaha aryštu», — paviedamiŭ jon.

«Asnoŭnaja sutnaść hetaj spravy zaklučajecca ŭ tym, što nazvanyja asoby bieź dziaržaŭnaj rehistracyi i licenzii na ažyćciaŭleńnie bankaŭskaj dziejnaści zajmalisia joju i atrymlivali niezakonny dachod», — skazaŭ Šajeŭ.

Pavodle jaho słoŭ, rasśledavańnie ŭ dačynieńni da vyšejšych kiraŭnikoŭ finansavaj piramidy «MMM-2011» budzie zavieršana najbližejšym časam.

Ci budzie vydzielena ŭ asobnuju vytvorčaść «dziejnaść astatnich udzielnikaŭ hetaj piramidy», płanujecca vyznačyć paźniej, skazaŭ staršynia SK.

Nahadajem, supracoŭniki minskaha ofisa «MMM-2011» byli zatrymanyja śpiecsłužbami 16 sakavika 2012 hoda. U dačynieńni da ich KDB raspačaŭ spravu pa č. 3 art. 233 KK. Rasśledavańnie było pieradadzienaje ŭ Śledčy kamitet.

U vyniku niezakonnaj dziejnaści kampanii «MMM-2011» u finansavyja machinacyi byli ŭciahnutyja niekalki tysiač hramadzian Biełarusi. Asnoŭny kantynhient udzielnikaŭ finansavaj piramidy skłali maładyja ludzi 1985–1990 hadoŭ naradžeńnia, nieznajomyja ź dziejnaściu MMM pačatku 1990-ch hadoŭ i jaje niehatyŭnymi nastupstvami dla miljonaŭ hramadzian.