Rassakrečanyja archivy: Pinačet čaplaŭsia za ŭładu, ale ZŠA byli nie na jahonym baku

25.02.2013 / 10:37

Pavodle źviestak rassakrečanych dakumientaŭ raźviedki ZŠA, były čylijski dyktatar Aŭhusta Pinačet u 1988 h. chacieŭ utrymać uładu paśla taho, jak prajhraŭ na refierendumie.

Aŭhusta Pinačet, fota 1973 h.

Jak vynikaje z dakumientaŭ, hienierał Pinačet šukaŭ padtrymki siarod svaich bližejšych sajuźnikaŭ vajskoŭcaŭ, kab anulavać vyniki refierendumu.

Adnak jany admovilisia, i Pinačetu pryjšłosia pryznać parazu.

Praz hod žychary Čyli abrali novy ŭrad, a ŭ 1990 h. Pinačet byŭ adchileny ad ułady.

Refierendum pry padtrymcy ZŠA

Pavodle źviestak dakumientaŭ z Archiva nacyjanalnaj biaśpieki, hienierał źbiraŭsia zrabić «usio, što nieabchodna», kab utrymać uładu. «Što b ni zdaryłasia, ja nie sychodžu», — kazaŭ Pinačet daradcam.

Hienierał byŭ u šalenstvie paśla taho, jak pacvierdzilisia vyniki refierendumu 5 kastryčnika, i sprabavaŭ pierakanać vajennych źmianić vyniki refierendumu.

Pavodle krynicy, cytavanaj u dakumiencie Pientahona, kamandujučy vajenna-pavietranymi siłami Čyli hienierał Fiernanda Matei adkinuŭ hety płan.

Kali Pinačet źviarnuŭsia z takoj prośbaj da inšych hienierałaŭ, jany taksama admovili jamu ŭ padtrymcy, i dyktataru pryjšłosia źmirycca z tym, što ŭłada sychodzić z-pad jaho kantrolu.

Dakumienty śviedčać pra toje, što ŭłady ZŠA padtrymlivali kampaniju suprać hienierała, niahledziačy na ​​toje, što pieršapačatkova padtrymlivali vajenny pieravarot, u vyniku jakoha ŭ 1973 hodzie byŭ zrynuty sacyjalistyčny ŭrad Salvadora Aljende.

U 1988 hodzie ŭ Čyli prahałasavali suprać vajennaj dyktatury, a ŭ 1990 h. pieršy demakratyčna abrany prezidentam paśla praŭleńnia Pinačeta staŭ Patrysia Ejłvin.

Pavodle aficyjnych dadzienych, za hady dyktatury byli zabityja bolš za 3 tys. čał.

Aŭhusta Pinačet pamior u 2006 h. Jamu byli pradjaŭlenyja abvinavačvańni ŭ karupcyi i šmatlikich parušeńniach pravoŭ čałavieka.