Pamior hienieralny kanstruktar MAZ, Hieroj Biełarusi Michaił Vysocki

26.02.2013 / 14:08

25 lutaha paśla praciahłaj chvaroby na 86-m hodzie žyćcia pamior vydatny vučony i kanstruktar ŭ halinie mašynabudavańnia, adzin z zasnavalnikaŭ biełaruskaj škoły hruzavoha aŭtamabilebudavańnia, Hieroj Biełarusi Michaił Ściapanavič Vysocki,

paviedamlaje sajt Nacyjanalnaj akademii navuk.

Raźvitańnie ź im adbudziecca 27 lutaha z 11.30 da 13.30 pa adrasie: vuł. Kastryčnickaja, 5. Pachavańnie projdzie na Uschodnich (Maskoŭskich) mohiłkach.

Michaił Ściapanavič Vysocki naradziŭsia 10 lutaha 1928 h. u Siemiežavie Kapylskaha rajona.
Pracoŭnuju dziejnaść pačaŭ u 1946 hodzie na Minskim aŭtamabilnym zavodzie (MAZ) ślesaram-zborščykam. U 1949 h. skončyŭ Minski aŭtamiechaničny technikum, u svajoj dypłomnaj pracy im byŭ prapanavany pieršy kanviejer dla zborki MAZaŭ. Z hetaha ž hoda pracavaŭ u jakaści kanstruktara, adnačasova navučajučysia va Usiesajuznym zavočnym mašynabudaŭničym instytucie ŭ Maskvie (skončyŭ u 1955 h.).

Pracavaŭ na Minskim aŭtazavodzie 50 hadoŭ, ź jakich 35 hadoŭ — hałoŭnym kanstruktaram.

Michaił Vysocki prasłaviŭsia jak kanstruktar, što stvaryŭ biełaruskuju škołu kanstrujavańnia i daśledavańniaŭ hruzavych aŭtamabilaŭ, byŭ vydatnym śpiecyjalistam u halinie miechaniki i kompleksnaha prajektavańnia mabilnych mašyn.

Ź imiem Vysockaha źviazany najbolš značnyja dasiahnieńni AAT «MAZ».

U 1992–1997 hadach M.Vysocki pracavaŭ vice-prezidentam AN Biełarusi i kansalidavaŭ namahańni navukoŭcaŭ i śpiecyjalistaŭ MAZa ŭ intaresach usioj aŭtatraktarabudaŭničaj haliny krainy, što dazvoliła pieražyć vostry ekanamičny kryzis, zabiaśpiečyć stanaŭleńnie nacyjanalnaha aŭtamabile-i aŭtobusabudavańnia i vyjści na ŭstojlivaje dynamičnaje raźvićcio haliny, robiačy značny ŭkład u farmiravańnie VUP i naroščvańnie ekspartnaha patencyjału krainy.

M.Vysocki byŭ pryznačany hienieralnym kanstruktaram pa aŭtatechnicy Biełarusi pastanovaj urada ŭ 2002 hodzie. Byŭ uznaharodžany dziaržaŭnymi premijami SSSR i BSSR, ordenami Pracoŭnaha Čyrvonaha Ściaha, Lenina, Ajčyny III stupieni i II stupieni, u 2006 hodzie ŭdastojeny zvańnia «Hieroj Biełarusi».

nn.by