Chrystafor Sarakašyš: «My spadziajemsia na rozum Alaksandra Łukašenki»
27.02.2013 / 13:29
Dva miesiacy tamu rasijanina Hieorhija Sarakašyša ŭ Minsku aryštavaŭ KDB. Sarakašyš pracavaŭ dyrektaram sanatoryja «Biełaruś» u Sočy (naležyć Kiraŭnictvu spravaŭ prezidenta Biełarusi). U Kamitecie nie kamientujuć hetaj spravy, ale ŚMI stała viadoma, što mienavita Sarakašyša padazrajuć u vialikich kradziažach pry budoŭli. U rasijskim pasolstvie paviedamili, što jamu inkryminujuć kradziež šlacham złoŭžyvańnia słužbovymi paŭnamoctvami ŭ bujnym pamiery. Pakul
«NN» źviazałasia z bratam aryštavanaha rasijanina Chrystaforam Sarakašyšam. Zvanok zaśpieŭ jaho ŭ Maskvie, kudy jon pryjechaŭ na pachavańnie stryječnaha brata.
«NN»: Kali zatrymali Hieorhija?
CHS: 21 śniežnia jany vyjechali ŭ Minsk na naradu ŭ Kiraŭnictva spravaŭ prezidenta. Zvyčajna jeździać płany vyznačać. Paśla hetaha my daviedalisia pra zatrymańnie.
Zatrymali spačatku na try dni. Firmy niedavykanali rabot i niechta kamuści vinny. Heta čysta haspadarčaja sprava. Ale zatym praciahnuli aryšt na dva miesiacy, a ciapier jašče na dva. Dumaju, chočuć pradjavić chabar. Jon tam jak u załožnikach. Heta znoŭ 1937 hod? Z roźnicaj, što ciapier tolki nie rasstrelvajuć…
Ludzi pracavali sumlenna. Z budaŭnictvam jany išli napierad. Hrošaj, kali nie było, firmy pracavali za svaje. Bo viedali, što biełarusy vypłaciać.
«NN»: Z kim pajechaŭ Vaš brat u Minsk?
CHS: Sa svaim namieśnikam biełarusam Kizimam i dyrektaram budaŭničaha abjekta, taksama rasijaninam.
Biełarusy dva hady tamu namieśnikam prysłali Kizimu, kab jon zajmaŭsia budoŭlaj. Maŭlaŭ, bratu adnamu składana. Hieorhij nie padpisvaŭ rachunkaŭ, pakul namieśnik nie adobryć i sam nie padpiša. «Nie chvalujciesia, vaš dyrektar vierniecca», — kazali supracoŭnikam sanatoryja. Viarnuŭsia, tolki nie toj.
Ja čakaŭ, što raźbiarucca dy prabačacca. A tut dyrektara novaha pryznačyli.
«NN»: Da jakich firm pretenzii ŭ biełaruskaha boku?
CHS: «Novy horad BKD» i «Karparacyja FBH». Biełarusy apielujuć da taho, što jany nie dabudavali. «Biełaruś» nibyta vystaviła sumy škody 100 młn rasijskich rubloŭ (kala $3,3 młn) adnoj firmie i 50 młn druhoj. Biełaruski bok sam pravioŭ ekśpiertyzy i abvieściŭ, što nie dabudavali. A prapanovu sumiesnaj ekśpiertyzy admoviŭ. Raźbiaryciesia narešcie, chto kamu vinny!
Voźmuć zakładnikaŭ, a paśla kažuć, što adpuściać jak tolki firmy vypłaciać hrošy.
Hetyja firmy padali ŭ sud na biełarusaŭ, kab viarnuć svaje hrošy.
«NN»: Čamu vy tak doŭha nie paviedamlali pra aryšt brata?
CHS: My nie padymajem vialikaha šumu, bo spadziajemsia na rozum Alaksandra Łukašenki. Vaš prezident narmalna staviŭsia da Hieorhija Kanstancinaviča. Brat addavaŭsia tamu, kab «Biełaruś» kvitnieła. Nam kažuć: «Vy padazrona maŭčycie. Niešta ŭ hetym jość, kali maŭčycie. Čaho vy čakajecie?»
Iduć budoŭli. Byvajuć niejkija pretenzii, jakija vyrašajucca šlacham pieramoŭ. Voś jany i pajechali damaŭlacca. Ale nie paśpieli zajści, jak ich aryštavaŭ KDB. Ludzi pajechali ŭ pieradśviatočnym nastroi. I dumki nie było, što mohuć zatrymać. Inačaj ci pajechali b?
***
Chto kamu vinny?
Firma «Novy horad BKD» i «FBH Karparacyja» pačali sudzicca z sanatoryjem «Biełaruś».
Arbitražny sud Krasnadarskaha kraja razhladaje dźvie spravy firmy «Novy horad» pa spahnańni z sanatoryja 207 miljonaŭ 712 tysiač rasijskich rubloŭ (kala $6,7 miljonaŭ) i 58 miljonaŭ 64 tysiač (kala $1,9).
«FSH Karparacyja» patrabuje značna mienšuju sumu — 905 150 rasijskich rubloŭ (kala $30 tysiač).
Heta pytańni zapazyčanaści sanatoryja pierad zabudoŭščykami.