Łukašenka ŭsio ž lacić u Vieniesuełu, kab asabista raźvitacca z Čavesam

07.03.2013 / 13:43

Uličvajučy asablivy siabroŭski charaktar i stratehičny ŭzrovień biełaruska-vieniesuelskich adnosinaŭ, Alaksandr Łukašenka vyrašyŭ asabista pryniać udzieł u žałobnych cyrymonijach u Karakasie ŭ suviazi sa śmierciu prezidenta Balivaryjanskaj Respubliki Vieniesueła Uha Čavesa.

Pra heta paviedamlaje pres-słužba biełaruskaha kiraŭnika.

Tradycyjny ŭračysty pryjom z nahody Dnia žančyn ad imia kiraŭnika biełaruskaj dziaržavy vyrašana pieranieści na bolš poźni termin.

Alaksandr Łukašenka pryniaŭ rašeńnie nakiravacca ŭ Karakas, niahledziačy na šerah mižnarodnych vizitaŭ i zahružanaść svajho pracoŭnaha hrafika. Heta źviazana z tym, što ŭ Uha Čavesa nie było bolš blizkich i siabroŭskich adnosinaŭ ź nivodnym z kiraŭnikoŭ zamiežnych dziaržaŭ, jak z prezidentam Biełarusi. «Dziakujučy siabroŭstvudvuch lidaraŭ našy krainy za adnosna karotki pramiežak času dasiahnuli ŭražlivych vynikaŭ u raźvićci adnosin va ŭsich śfierach», — paviedamlaje BiełTA sa spasyłkaj na pres-słužbu.

Napiaredadni aficyjna paviedamlałasia, što Łukašenka rasparadziŭsia nakiravać u Karakas dla ŭdziełu ŭ žałobnych mierapryjemstvach aficyjnuju delehacyju

ŭ składzie kiraŭnika spraŭ prezidenta, sustaršyni biełaruska-vieniesuelskaj kamisii vysokaha ŭzroŭniu Viktara Šejmana i pieršaha vice-premjera, sustaršyni biełaruska-vieniesuelskaj sumiesnaj kamisii pa handlova-ekanamičnym supracoŭnictvie Uładzimira Siamaški.

Prezident Vieniesueły Uha Čavies pamior 5 sakavika. U suviazi z hetym ŭ Biełarusi abjaŭlena trochdzionnaja žałoba.

Pachavańnie Čaviesa projdzie 8 sakavika.

Jak paviedamlajuć zamiežnyja infarmahienctvy, raźvitacca ź lidaram Vieniesueły asabista ŭ Karakasie majuć namier lidary Ekvadora, Pieru, Arhienciny, Uruhvaja, Čyli, Balivii i inšych krain. Ad Rasii ŭ Karakas adpraviacca prezident kampanii «Rasnafta» Ihar Siečyn, kiraŭnik «Rastechnałohij» Siarhiej Čemiezaŭ i ministr pramysłovaści Dzianis Manturaŭ, paviedamiŭ pres-sakratar Uładzimira Pucina Dźmitryj Piaskoŭ, dadaje BiełaPAN.