Dziaržabvinavaŭca prosić dla Dorna piać hadoŭ turmy z kanfiskacyjaj majomaści
21 sakavika ŭ sudzie Centralnaha rajona Minska adbylisia sprečki pa spravie staršyni Iudziejskaha relihijnaha abjadnańnia ŭ Biełarusi Juryja Dorna.
21.03.2013 / 20:11
Dziaržabvinavaŭca zapytaŭ u suda ŭ jakaści pakarańnia dla Dorna piać hadoŭ pazbaŭleńnia voli va ŭmovach uzmocnienaha režymu z kanfiskacyjaj majomaści.
Dziaržabvinavaŭca taksama prapanuje zabaranić Dornu zajmać pasady, źviazanyja z arhanizacyjna-rasparadčaj dziejnaściu, na praciahu piaci hadoŭ i abaviazać jaho vypłacić štraf u 500 bazavych vieličyń.
Dorn abvinavačvajecca ŭ niekalkich epizodach učynieńnia złačynstvaŭ, praduhledžanych čč. 1, 2, 3 art. 426 Kryminalnaha kodeksa (pieravyšeńnie ŭłady ci słužbovych paŭnamoctvaŭ) i č. 2 art. 243 Kryminalnaha kodeksa (uchileńnie ad vypłaty padatkaŭ, zboraŭ u asabliva bujnym pamiery). Novaje abvinavačańnie było abvieščanaje na pracesie ŭ sudzie Centralnaha rajona Minska 28 lutaha.
Pieršapačatkova Dornu inkryminavałasia ŭčynieńnie złačynstvaŭ, praduhledžanych č. 3 art. 430 KK (atrymańnie chabaru ŭ asabliva bujnym pamiery), čč. 1, 2, 3 art. 426 KK (pieravyšeńnie ŭłady ci słužbovych paŭnamoctvaŭ), č. 2 art. 243 KK (uchileńnie ad vypłaty padatkaŭ, zboraŭ u asabliva bujnym pamiery), č. 1 art. 427 KK (słužbovy padłoh), č. 2 art. 377 KK (kradziež, źniščeńnie, paškodžańnie abo ŭtojvańnie dakumientaŭ, štampaŭ, piačatak, kradziež błankaŭ).
Dornu, u pryvatnaści, stavicca ŭ vinu zachop u 2001—2002 hadach doma ŭ haradskim pasiołku Raduń Voranaŭskaha rajona Hrodzienskaj vobłaści, jaki ŭ niekalki pryjomaŭ byŭ nabyty ad imia relihijnaha abjadnańnia nibyta dla stvareńnia ŭ im muzieja adnaho ź jaŭrejskich relihijnych dziejačaŭ. Paśla afarmleńnia ździełki dom z dapamohaj miascovych žycharoŭ byŭ razabrany i vyviezieny cieraz punkt propusku "Bieniakoni" ŭ Litvu dla adhruzki ŭ ZŠA. Zatym Dorn, pavodle viersii śledstva, kab utaić niezakonnaje nabyćcio doma ŭ Raduni, źniščyŭ dakumienty, što śviedčyli pra ažyćciaŭleńnie ździełki i vyvaz majomaści relihijnaha abjadnańnia za miažu. Dorn taksama abvinavačvajecca ŭ tym, što biez dazvołu praŭleńnia abjadnańnia adnaasobna zdavaŭ u arendu pad ofisy i składy pamiaškańni relihijnaj arhanizacyi ŭ Minsku roznym subjektam haspadarańnia. U 2005—2012 hadach było zaklučana niekalki dziasiatkaŭ dahavoraŭ arendy.
Častka z vystaŭlenych raniej abvinavačvańniaŭ dziaržabvinavačańniem byli pierakvalifikavanyja.
47-hadovy Juryj Dorn zatrymany 13 sakavika 2012 hoda. Pieršaja sprava ŭ dačynieńni da jaho była raspačataja Śledčym kamitetam pa č. 3 art. 430 KK (atrymańnie chabaru ŭ asabliva bujnym pamiery). Tady paviedamlałasia, što Dorn byŭ zatrymany pry atrymańni niezakonnaj hrašovaj uznaharody ad adnaho z kiraŭnikoŭ subjektaŭ haspadarańnia. Ustanoŭlena, što, źjaŭlajučysia słužbovaj asobaj, adkaznaj za vykanańnie arhanizacyjna-rasparadčych i administracyjna-haspadarčych funkcyj abjadnańnia, jon atrymaŭ hrašovyja srodki ŭ pamiery bolš jak 13 tysiač dołaraŭ za stanoŭčaje vyrašeńnie pytańnia ab zaklučeńni dahavora arendy niežyłych pamiaškańniaŭ, jakija naležać relihijnamu abjadnańniu.
Sprava rasśledavałasia hałoŭnym śledčym upraŭleńniem Śledčaha kamiteta Biełarusi.