Źjaviŭsia saŭndtrek da filma «Žyvie Biełaruś»: Volski hienijalny, jak zaŭždy
+ tekst i videa
12.04.2013 / 09:58
U Siecivie źjaviŭsia saŭndtrek da filma «Žyvie Biełaruś». Pieśniu «Krainy niama» napisaŭ Lavon Volski. Film «Žyvie Biełaruś» stanie pieršaj paŭnamietražnaj stužkaj ab našaj krainie, jakuju pabačyć suśvietny hladač. Stužka ŭ mastackaj formie apaviadaje pra nacyjanalna-vyzvolny ruch u Biełarusi.
Dla hienierała kraina — vajna.
Dla niefarmała kraina — čuma.
Dla radykała kraina — turma.
Ale dla bolšaści krainy niama.
Dla pansłavista kraina — adna.
Dla satanista kraina — truna.
Dla hitarysta kraina — struna.
Ale dla bolšaści krainy niama.
Viarni žyćcio svajoj krainie,
Jana ŭ śnie chałodnym hinie!
Viarni žyćcio svajoj ziamli,
Jaje sivyja śniahi zamiali.
Dla nielehała kraina — zima.
Dla admirała kraina — karma.
Dla vykidały kraina — karčma.
Ale dla bolšaści krainy niama.
Viarni žyćcio svajoj krainie,
Jana ŭ śnie chałodnym hinie!
Viarni žyćcio svajoj ziamli,
Jaje sivyja śniahi zamiali.
Viarni žyćcio svajoj krainie,
Jana ŭ śnie chałodnym hinie!
Viarni žyćcio svajoj ziamli,
Masty spali i ziamlu aśviatli.
Stužka zasnavanaja na realnych padziejach, pieraasensavanych scenarystami, kab historyja biełaruskaha junaka-muzyki stała zrazumiełaja na ŭsich kantynientach.
Nad filmam pracavali Polskaja dziaržaŭnaja kinastudyja mastackich i dakumientalnych filmaŭ (WFDIF) i francuzski Canal+. Suśvietny dystrybucyjaj filma «Žyvie Biełaruś» zajmajecca italjanskaja kampanija Intramovies. Viva Belarus — tak budzie hučać nazva filma ŭ suśvietnym prakacie. 19 krasavika film vyjdzie ŭ Polščy. Uletku zapłanavany vychad kino na telebačańni.
Režysior filma — Kšyštaf Łukaševič, adzin sa scenarystaŭ — biełaruski aktyvist i žurnalist Franak Viačorka. Akurat jahonaja historyja słužby ŭ vojsku lehła ŭ asnovu siužeta. Hałoŭny hieroj filma — rok-muzyka Miron, hurt jakoha traplaje ŭ «čorny śpis», a sam jon — u vojska. Jaho dopisy ŭ internet-błohu, dzie jon raskryvaje ciomnyja baki žyćcia ŭ kazarmie, vyklikajuć «veb-revalucyju». Rolu rok-muzyki Mirona Zacharki vykanaŭ repier Źmicier (Vincent) Papko. Narodžany ŭ Ivacevickim rajonie, jon vučyŭsia ŭ BDU na žurfaku, a paśla vybraŭ mastackuju karjeru.
U filmie źnialisia taksama akciory Dzianis Tarasienka, Aleś Małčanaŭ, Raman Padalaka, Anatol Kot, šoŭmen Alaksandr Pamidoraŭ, polskaja zorka Karalina Hruška vykonvaje hałoŭnuju žanočuju rolu.