Маладая дзяўчына падманула складаную сістэму кантролю «БелСвісБанка»

Следчы камітэт пачаў новыя крымінальныя справы па факце буйнога крадзяжу сродкаў у ЗАТ «БелСвісБанк».

23.04.2013 / 10:22

Як высветлілася, маладая 25-гадовая дзяўчына змагла без асаблівых цяжкасцяў падмануць складаную сістэму кантролю і скрасці сродкі банка.

У пачатку 2013 года Следчы камітэт пачаў крымінальную справу ў дачыненні да касіра-кантралёра аддзела касавага абслугоўвання дэпартамента па аперацыйнай працы «БелСвісБанка». Маладой 25-гадовай дзяўчыне паставілі ў віну здзяйсненне злачынства па арт.217 Крымінальнага кодэкса Беларусі (незаконнае бязвыплатнае адчужэнне ў значным памеры чужой маёмасці, даручанай вінаватаму, пры адсутнасці карыслівай мэты). Паводле дадзеных праваахоўных органаў, дзяўчына вынесла з банка буйныя сумы грошай, якія затым перадала свайму знаёмаму. Пры гэтым у самім банку спачатку нават не заўважылі знікнення буйных сум сродкаў, хоць улік абароту наяўных вёўся ў фінансавай установе вельмі строга.

Праз тры месяцы пасля пачатку расследавання Следчы камітэт высветліў, як гэта стала магчымым. Асноўныя аргвысновы будуць пазней, але папярэднія вынікі расследавання не вельмі суцяшальныя.

Як адзначаюць у Следчым камітэце, нягледзячы на тое, што расследаванне яшчэ не завершанае, ужо цяпер можна зрабіць выснову аб неналежнай сістэме кантролю за абаротам наяўных сродкаў, якая існавала ў банку. Працэдура была вельмі складаная, але неэфектыўная. Для крадзяжу буйных сум грошай патрабавалася толькі падрабіць пару паперак, што і зрабіла падазраваная, даўшы следчым нагоду інкрымінаваць ёй здзяйсненне злачынства і па ч.1 арт. 427 Крымінальнага кодэкса Беларусі (службовы падлог).

Паводле дадзеных следства, маладая дзяўчына 10 кастрычніка 2012, каб выкрасці з банка грошы, проста не ўнесла грашовыя сродкі, атрыманыя ёю ў гэты ж дзень ад іншых касіраў банка. Затым з мэтай утойвання крадзяжу яна склала і выдала дакумент, які дае права на перадачу наяўных з касы банка. Так яна склала кантрольны ліст прынятых і выдадзеных каштоўнасцяў, паводле якога не перадавала больш за мільярд рублёў і не прымала 50 тысяч даляраў у якасці падмацавання ў касу ад іншага касіра. Гэтыя дакументы дзяўчына падала адпаведным службовым асобам ЗАТ, якія ажыццяўляюць наступны кантроль за рухам наяўных сродкаў. Самае дзіўнае, што такая немудрагелістая камбінацыя прайшла вельмі ўдала, што і дазволіла маладой і зусім не спрактыкаванай дзяўчыне вынесці з банка буйную суму грошай.

На жаль, у самім банку адмовіліся патлумачыць, як стаў магчымым такі крадзеж і што было зроблена, каб такое не паўтарылася.