Dzie pracujuć dzieci biełaruskich čynoŭnikaŭ?
Dziaržaŭnaja słužba ich nie vabić.
09.06.2013 / 10:23
Siaredniestatyčny biełaruski čynoŭnik vysokaha ranhu — mužčyna, jakomu zusim trochi zastałosia da 55 hadoŭ. Jon naradziŭsia ŭ vioscy, pryjechaŭ u stalicu, skončyŭ BDU, palitech ci BDEU, padniaŭsia pa karjernaj leśvicy… «Maje žonku i dvaich dziaciej» — na takoj aptymistyčnaj nocie skančvajecca bolšaść bijahrafij čynoŭnikaŭ.
U adroźnieńnie ad Zachadu, u biełaruskaj palityčnaj kultury nie pryniata vystaŭlać siamju na ahulny ahlad. Adnak čas idzie, pradstaŭniki «pakaleńnia next» pačynajuć rabić svaju karjeru — kamuści ŭ hetym dapamahajuć baćki, niechta ŭsiaho dasiahaje sam. Maładziejšyja dzieci čynoŭnikaŭ i hramadskich dziejačaŭ tym časam nie curajucca rehistravacca ŭ sacyjalnych sietkach dy publikavać svaje zdymki, navat intymnaha płana.
«Naša Niva» daviedałasia, čym zajmajucca dzieci niekatorych upłyvovych biełarusaŭ. My źviarnuli ŭvahu na tych, chto prysutničaje ŭ hramadskim žyćci krainy ci aktyŭničaje ŭ sacyjalnych sietkach.
Alaksiej Jarmošyn
Staršynia Centralnaj vybarčaj kamisii Lidzija Jarmošyna raskazvała, što pieražyła dva razvody. Abodva razy siamja raspadałasia pa jaje inicyjatyvie. Chłopčyki, jakija vyraśli biez baćki, nie majuć uspaminaŭ, što takoje žyćcio ŭ paŭnavartasnaj siamji, praciahvała jana. I pryvodziła ŭ prykład svajho niežanataha syna.
Alaksiej, jakomu pajšoŭ čaćviorty dziasiatak, ciapier pracuje advakatam u Minskaj abłasnoj śpiecyjalizavanaj jurydyčnaj kansultacyi. A raniej stajaŭ pa inšy bok barykadaŭ — niekalki hadoŭ tamu fihuravaŭ jak namieśnik prakurora Frunzienskaha rajona Minska.
Jania Łatuška
Francuzskaje žyćcio pačałosia dla Jani niečakana.
Razam z baćkam u Viersali na jaho dzień naradžeńnia.
Były ministr kultury Pavieł Łatuška raskazvaŭ u intervju, što paśla jahonaha razvodu z žonkaj dziesiacihadovaja dačka Jania zastałasia ź im.
Letaś jana skončyła staličnuju himnaziju i pastupiła ŭ BDU. A ciapier pieknaja dziaŭčyna žyvie na dźvie krainy. Jaje baćka byŭ pryznačany ambasadaram u Francyi, a jana pačała pracu ŭ konsulskaj słužbie. «Siońnia samastojna vydała pieršuju vizu z Francyi ŭ Biełaruś», — pachvaliłasia niadaŭna Jania. Ale časam joj davodzicca prylatać u Minsk. Hetymi dniami dziaŭčyna jakraz zdaje siesiju.
Volha i Inha Pralaskoŭskija
Dźvie dački ministra.
U artylerysta Aleha Pralaskoŭskaha, jaki z 2009 uznačalvaje ministerstva infarmacyi, dźvie dački. Starejšaja, Volha, prasłaviłasia adrazu ŭ dvuch kirunkach dziejnaści.
Pa-pieršaje, jak aśpirantka Akademii kiravańnia jana apublikavała ŭ časopisie «Biełaruskaja dumka» vykryvalny artykuł pra sacyjalnyja sietki. «Apanienty ŭłady prykryvajuć svaje namiery kradzienymi łozunhami», «pratest nakiravany na dezyntehracyju biełaruskaha naroda i faktyčna pazbaŭlaje moładź i hramadstva toj samaj budučyni», — pisała Volha pra dziejnaść «Revalucyi praz sacyjalnyja sietki» ŭ Biełarusi.
Padruhoje, u volny ad vučoby čas dziaŭčyna śpiavaje. Sceničnaje imia — Julijana. Pad takim psieŭdanimam jana trapiła ŭ lik pieramožcaŭ konkursu «Zorny dyližans» u siaredzinie 2000¬ch.
Małodšaja Inha navučajecca ŭ Linhvistyčnym univiersitecie. Zrešty, hetuju ŭstanovu skončyła i jaje siastra. U akaŭncie Inhi vykładzienyja jaje zdymki z adpačynku. Kamientujučy ich, dziaŭčyna narakaje, maŭlaŭ, pakul niekatoryja jaje siabroŭki jeździać u Łondan, jana piaty raz zapar adpačyvaje ŭ Sočy.
Hleb i Alaksandr Kamiankovy
Vialikaja siamja Kamiankovych.
Hleb Kamiankoŭ padkreślivaje na fota, što karystajecca pradukcyjaj Apple.
Alaksandr Kamiankoŭ sfotkaŭ siamiejny asabniak u Drazdach.
Viktar Kamiankoŭ — adzin z rekardsmienaŭ łukašenkaŭskaj Biełarusi pa niaspynnym znachodžańni na vysokaj pasadzie. Ad 2001 hoda jon uznačalvaje Vyšejšy haspadarčy sud.
Jurydyčnuju adukacyju atrymała ŭsia siamja Kamiankovych. Žonka Ludmiła voś užo piać hadoŭ źjaŭlajecca staršynioj Ekanamičnaha suda SND. Doŭhi čas jana pracavała ŭ sistemie Ministerstva zamiežnych spraŭ Biełarusi. U šlubie Kamiankovy ŭžo 32 hady! Ciapier žyvuć u katedžy ŭ Drazdach.
Ich starejšaha syna Hleba na forumie jurfaka nazyvali «samym pryhožym studentam fakulteta». Paśla vučoby ŭ BDU jon adsłužyŭ u Pamiežnych vojskach, a ciapier pracuje ŭ Minskaj haradskoj kalehii advakataŭ.
A voś małodšy Alaksandr adkryŭ svaju jurydyčnuju kampaniju «Just Kamiankoŭ». I adnačasova dapamahaje žoncy Viery arhanizoŭvać viasielli. Pryjemna, što ŭ sacyjalnych sietkach Alaksandr piša pa-biełarusku.
Natalla Ihnacienka
Natalla Ihnacienka, dačka kiraŭnika prezidenckaj administracyi i lidara «Biełaj Rusi» Alaksandra Radźkova, žyvie i pracuje ŭ Maskvie. Jana vykładčyca muzyki i śpievaŭ u pačatkovaj škole. «Ja adčuvaju biaskoncuju nastalhiju pa rodnaj ziamli», — pryznajecca Natalla.
U volny čas jana piša vieršy, paśpieła vydać dva zborniki: «Jak prafiesiju sabie dzieci vybirali» i «Kazačnyja padarožžy z pryhodami». Pa-biełarusku jany zahučali ŭ pierakładzie paetki Raisy Baravikovaj.
Ryfmavać słovy dačku navučyŭ sam Alaksandr Radźkoŭ. «U volny čas jon pravodziŭ sa mnoj paznavalnyja viktaryny, roznyja hulni. Siarod lubimych — buryme (vieršy, jakija pišucca na zadadzienyja ryfmy)», — raskazvała jana.
Natalla haduje dla ŭpłyvovaha taty dvuch unukaŭ. Starejšy, Pavieł, zajmajecca fihurnym katańniem (na fota). Jon trenirujecca ŭ Maskvie, ale vystupaje za Biełaruś. Sioleta chłopiec staŭ 13-m na čempijanacie Jeŭropy, a voś na čempijanat śvietu ŭ Kanadu lidar biełaruskaj zbornaj nie palacieŭ — nie ŭdałosia adkryć vizu.
Andrej Kozik
Leanid Kozik voś užo adzinaccaty hod uznačalvaje aficyjnuju fiederacyju prafsajuzaŭ. Jahony syn Andrej tym časam pracuje pieršym prarektaram prafsajuznaha ŭniviersiteta MITSO. Adnak pisać pra jakuju¬kolviek suviaź hetych faktaŭ niebiaśpiečna. Niekalki hadoŭ tamu Andrej Kozik sudziŭsia z sajtam Abjadnanaj hramadzianskaj partyi za artykuł «Siamja robić biznes».
Kozik małodšy skončyŭ Akademiju kiravańnia, paśla čaho zaniaŭsia jurydyčnaj praktykaj. Jon pracavaŭ u jakaści ekśpierta ŭ składzie aficyjnych delehacyj Biełarusi ŭ inšych krainach śvietu. Kali dziaržava źviarnułasia ŭ sud JeŭrAzES z pazovam da Rasii, vypracoŭvać jurydyčnuju pazicyju paklikali mienavita Kozika.
Jon ža byŭ zasnavalnikam jurydyčnaj kampanii «Arhumient'», jakaja, siarod inšaha, zajmajecca supravadžeńniem inviestycyjnych prajektaŭ u Biełarusi.
Alesia Kapskaja
Dyrektar zavoda BATE i adnajmiennaha futbolnaha kłuba Anatol Kapski adpraviŭ dačku vučycca ŭ Livierpul. U 2011 Alesia atrymała stupień mahistra biznesadministravańnia sa śpiecyjalizacyjaj u futbolnaj industryi. A za hod da taho skončyła BDU pa śpiecyjalnaści «juryst-mižnarodnik». Ciapier Alesia Kapskaja — namieśnik načalnika departamienta raźvićcia ŭ tatavym kłubie.
A syn Andrej, zhodna z ankietaj, vyvučaje mieniedžmient u BDU.
Siarhiej Vasilevič
«My ŭdziačnyja prafiesaru Ryhoru Alaksiejeviču Vasileviču i Siarhieju Ryhoraviču Vasileviču za mahčymaść daviedacca ab pracy prakuratury pa abaronie pravoŭ i svabod hramadzian», — havorycca ŭ spravazdačy sa schodu adnaho z hurtkoŭ jurydyčnaha fakulteta BDU. Asnoŭnaje miesca pracy adstaŭnoha staršyni Kanstytucyjnaha suda, a paśla i hienieralnaj prakuratury — kafiedra kanstytucyjnaha prava jurfaka. Na toj samaj kafiedry pa sumiaščalnictvie pracuje i syn Siarhiej.
Adrazu paśla zakančeńnia ŭniviersiteta Vasileviča¬małodšaha ŭziali pamočnikam prakurora Maskoŭskaha rajona Minska. Ciapier jon pracuje «ŭ aparacie prakuratury» stalicy. 29-hadovy navukoviec paśpieŭ abaranić kandydackuju dysiertacyju, pryśviečanuju administratyŭnym spahnańniam materyjalnaha charaktaru.
Uładzisłaŭ Andrejčanka
Syn kolišniaha hubiernatara Viciebščyny, a ciapier staršyni pałaty pradstaŭnikoŭ Uładzimira Andrejčanki pracuje ŭ kampanii MTS. Z 2007 Uładzisłaŭ uznačalvaje viciebskuju filiju mabilnaha apieratara. U ankiecie paznačana, što jon maje niekalki vyšejšych adukacyj.
Admietna, što na Viciebščynie MTS spansaruje mierapryjemstvy pa papularyzacyi biełaruskaj movy — naprykład, konkurs «Kazka dla Karatkieviča» i fołk-rok fiestyval «Połacki sšytak».
* * *
U kiraŭnicy Nacbanka Nadziei Jermakovaj dźvie dački. Abiedźvie atrymali ekanamičnuju adukacyju, adnak pa śpiecyjalnaści nie pracujuć. Starejšaja Natalla zajmajecca chatniaj haspadarkaj i haduje dvaich dziaciej. A voś małodšaja Julija adkryła svaju fotastudyju. Jana haduje jašče adnaho ŭnuka staršyni Nacbanka.
* * *
Syn bresckaha hubiernatara Kanstancina Sumara bolš za hod kiruje bresckaj abłasnoj DAI. Pałkoŭnik milicyi Andrej Sumar raniej uznačalvaŭ kamianieckuju milicyju. U jaho dźvie adukacyi — Brescki dziaržaŭny ŭniviersitet i Akademija MUS.
* * *
Pieršaja namieśnica kiraŭnika Administracyi prezidenta Natalla Piatkievič haduje syna Filipa. Małady čałaviek vučycca ŭ Licei BDU — samaj prestyžnaj daŭniviersiteckaj navučalnaj ustanovie krainy.