Piensija Stanisłava Šuškieviča składaje ŭžo tolki 37 centaŭ

21.06.2013 / 13:09

Jak viadoma, A.Łukašenka ŭ 1997 hodzie admianiŭ pastanovu parłamienta ab pažyćciovaj piensii byłym premjeru i kiraŭniku dziaržavy ŭ pamiery 70–75% ad akładu dziejučych premjera i śpikiera i padpisaŭ dekret ab «uparadkavańni piensij za asablivyja zasłuhi pierad biełaruskim narodam».
Pa sutnaści, Łukašenka asabista vyznačyŭ, kamu dać vysokija piensii, a kamu — nie.

Atrymałasia, što piensii za asablivyja zasłuhi byli pryznačany ŭ asnoŭnym pieršym asobam savieckaj Biełarusi, naprykład, byłym kiraŭnikam Kampartyi Biełarusi Mikałaju Śluńkovu i Jafremu Sakałovu. Piaciarym byłym kiraŭnikam niezaležnaj Biełarusi — Stanisłavu Šuškieviču, Hieorhiju Tarazieviču, Siamionu Šareckamu, Miečysłavu Hrybu i Michaiłu Čyhiru — dadzienym dekretam piensija była pakinuta na tym uzroŭni, na jakim znachodziłasia na momant padpisańnia dekreta, adnym słovam, «zamarožana». U 1997 hodzie heta było 3 miljony 196 tysiač biełaruskich rubloŭ, a paśla denaminacyi 1999 hoda stała 3200 rubloŭ u miesiac. Siońnia takuju piensiju i atrymlivaje Stanisłaŭ Šuškievič. Kali pieravieści jaje ŭ dołary ZŠA, to atrymajecca 37 centaŭ pa kursie Nacbanka.

Treba adznačyć, što Šuškievič, jaki doŭhi čas śćviardžaŭ, što pryncypova nie choča što-niebudź prasić i prynižacca, u 2002 hodzie ŭsio ž taki źviarnuŭsia ŭ sud, adnak u isku jamu było admoŭlena.
Sudovaje rašeńnie Šuškievič abskardziŭ, dajšoŭ da Viarchoŭnaha suda, ale i adtul pryjšoŭ adkaz: usio pravilna, piensija vypłačvajecca ŭ adpaviednaści ź isnujučym zakanadaŭstvam.

U 2010 hodzie praz «Narodnuju Volu» Stanisłaŭ Šuškievič źviarnuŭsia da tahačasnych prem'jer-ministra Biełarusi Siarhieja Sidorskaha, staršyni savieta respubliki Anatolija Rubinava, staršyni pałaty pradstaŭnikoŭ Uładzimira Andrejčanki, kiraŭnika Administracyi prezidenta Uładzimira Makieja, staršyni Vyšejšaha Haspadarčaha suda Biełarusi Viktara Kamiankova z patrabavańniem adnavić spraviadlivaść.

«Vidavočna, što dekret, kali jon adpaviadaje Kanstytucyi, nie moža pieratvarać piensiju ŭ naśmiešku, zrabić jaje mienš za minimalnuju sacyjalnuju piensiju, — napisaŭ Šuškievič.

— Ale pavodle našych zakonaŭ ja sam nie mahu źviarnucca ŭ Kanstytucyjny sud, kab sud heta paćvierdziŭ. Tamu, u adpaviednaści z artykułam 116 Kanstytucyi RB, ja prašu Vas źviarnucca ŭ Kanstytucyjny sud, kab jon vyznačyŭ, nakolki adpaviadaje Kanstytucyi RB dekret prezidenta № 16 ad 9 vieraśnia 1997 hoda, zhodna ź jakim maja piensija pieratvorana ŭ naśmiešku i hańbić nie tolki taho, chto jaje pryznačyŭ svaim dekretam, ale i ŭsie dziaržaŭnyja instytuty, jakija majuć dačynieńnie da sacyjalnaha zabieśpiačeńnia».

Zrazumieła, što nichto z čynoŭnikaŭ piensijaj Šuškieviča zajmacca nie staŭ.

Ale jak možna pražyć na piensiju ŭ 37 centaŭ? Moža, Stanisłaŭ Stanisłavavič ad jaje ŭžo admoviŭsia?

— Piensiju kožny miesiac prynosić mnie damoŭ paštaljon, pa damoŭlenaści za jaje raśpisvajecca ciešča, — kaža Stanisłaŭ Šuškievič. — Zrazumieła, što ŭ cyvilizavanym hramadstvie takoha nie byvaje, heta hańba nie tolki Łukašenku, ale i dziaržavie, jakaja dazvalaje padobnaje.

Darečy, maja piensija — heta pakazčyk taho, jak razvivajecca ekanomika Biełarusi. Łukašenka svaim dekretam 1997 hoda pakinuŭ piensiju na tym uzroŭni, na jakim jana była ŭ 1996 hodzie, ale tady heta składała 300 dołaraŭ, a zaraz — 37 centaŭ! Zmarnieŭ naš rubiel bolš jak u 800 raz. U cyvilizavanaj krainie luby ŭrad, luboje kiraŭnictva daŭno ŭžo vylecieła b u trubu…

Što tyčycca mianie, to, dziakuj Bohu, zdaroŭje nie padvodzić, a zarabić na žyćcio ja mahu.

Zaraz voś čytaju kursavyja i dypłomnyja rabocy studentaŭ Varšaŭskaha ŭniviersiteta, dzie vykładaju. Darečy, u hetym hodzie ja čytaŭ lekcyi ŭ Polščy, Paŭdniovaj Karei, Aŭstryi

***

Ad piensii admovilisia…

Zhodna z dekretam A.Łukašenki 1997 hoda z takoj mizernaj piensijaj — 3 tysiačy 200 rubloŭ — zastaŭsia nie adzin Stanisłaŭ Šuškievič.

Na momant padpisańnia dekreta byłomu prem'jer-ministru Biełarusi Michaiłu Čyhiru jašče nie spoŭniłasia 60 hadoŭ, ale voś užo 5 hadoŭ, jak jon maje piensijonny ŭzrost.

— U 1996 hodzie, kali ja padaŭ u adstaŭku, pačaŭ atrymlivać hetuju piensiju, — raskazvaje Michaił Čyhir. — Ale potym jana abiasceniłasia, pieratvaryłasia ŭ ništo. Ja ad jaje admoviŭsia i atrymlivaju zaraz piensiju pa ŭzroście. Pakolki ja byŭ dziaržsłužačym, piensija bolš-mienš niebłahaja.

Što tyčycca jašče troch byłych kiraŭnikoŭ Biełarusi, to, jak viadoma, Hieorhij Tarazievič pamior bieź piensii, Siamion Šarecki źjechaŭ u zamiežža i siońnia žyvie ŭ ZŠA. Miečysłaŭ Hryb, jak i Michaił Čyhir, ad «piensii za asablivyja zasłuhi» admoviŭsia i atrymlivaje piensiju vajennasłužačaha. Hryb — hienierał-lejtenant milicyi.