Finlandyja maje namier ustupić u NATA

27.07.2013 / 10:25

Namieśnik ministra abarony ZŠA Džym Taŭnsend rasčaravany pazicyjaj Rasiei adnosna mahčymaha ŭstupleńnia Finlandyi ŭ NATA, paviedamlaje finskaja telekampanija YLE.

Pa słovach Taŭnsenda, jaki naviedaŭ Chielsinki, krainy pavinny mieć prava samastojna vyznačać, u jakich arhanizacyjach udzielničać, a ŭ jakich — nie.

«Raniej letam ministr abarony Rasii Siarhiej Šajhu ŭ časie svajho vizitu ŭ Finlandyju pryhraziŭ ŭ adkaz dziejańniami, kali Finlandyja ŭstupić u NATA», — adznačaje finskaja telekampanija.

Finlandyja praciahvaje vybudoŭvać svaju palityku biaśpieku, sychodziačy ź imaviernaści, što joj pryjdziecca adstojvać svaju niezaležnaść ad Rasii, jak u 1940-m. Tady nievialikaja nacyja paśpiachova supraćstajała ahresii SSSR, dziakujučy čamu zachavała suvierenitet. U adroźnieńnie ad Finlandyi, krainy Bałtyi nie zdoleli adstajać samastojnaść i byli akupavanyja savietami. U vyniku ŭ časie znachodžańnia ŭ SSSR dehradavaŭ ich ekanamičny i čałaviečy patencyjał, ich navadnili mihranty. Kali na 1940 hod Estonija pa svaim raźvićci była prykładna na adnym uzroŭni ź Finlandyjaj i Narviehijaj, to na 1990 hod jana rašuča adstavała.

Finlandyja zachoŭvaje pryzyŭ, abaviazkovuju vajskovuju słužbu. Jana zakuplaje supiersučasnuju amierykanskuju i šviedskuju vajskovuju techniku. Jaje arsienał supraćpavietranaj abarony i rakiety małoj dalnaści vyklikali krytyku rasijskaha Hienštaba.

Paśla Druhoj suśvietnaj Finlandyja była vymušana pravodzić vielmi aściarožnuju palityku niejtralitetu, kab nie razdražniać Maskvy. Adnak ciapier kraina choča skarystacca mahčymaściu trapić pad nadziejny NATAŭski i amierykanski abarončy parason. Pavodle acenak finskich analitykaŭ, siabroŭstva ŭ NATA praktyčna vyklučaje imaviernaść napadu na krainu.

Mikoła Buhaj