Новы ачаг свіной чумы зафіксаваны ў Смаленскай вобласці
30.07.2013 / 12:04
Новы ачаг афрыканскай чумы свіней (АЧС) зафіксаваны ў Смаленскай вобласці. Ад небяспечнага захворвання загінулі 35 свойскіх свіней у гаспадарцы індывідуальнага прадпрымальніка ў вёсцы Капыраўшчына Ярцаўскага раёна.
У раёне абвешчаны рэжым надзвычайнай сітуацыі, у зоне заражэння знішчаецца ўсё пагалоўе.
На працягу ліпеня афрыканская чума свіней была выяўлена ў прыватных падворках шэрагу населеных пунктаў Руднянскага, Краснінскага і Вяземскага раёнаў Смаленскай вобласці. На буйных свінагадоўчых комплексах рэгіёну прыняты беспрэцэдэнтныя меры біялагічнай абароны.
У цэлым па Расіі сітуацыя з распаўсюджваннем АЧС застаецца вельмі складанай. Па дадзеных Рассельгаснагляда, толькі з 27 па 28 ліпеня новыя ўспышкі АЧС выяўлены ў Маскоўскай, Цвярской, Тульскай і Яраслаўскай абласцях.