«Арэна-Львоў» дыскваліфікаваная ФІФА на пяць гадоў
27.09.2013 / 22:45
Сёння быў агучаны вырак па дысцыплінарнай справе аб расісцкіх выкрыках і дзеяннях заўзятараў зборнай Украіны на «Арэне-Львоў» падчас матчу групавога адбору да мундыяля-2014 Украіна — Сан-Марына (6 верасня 2013).
У рашэнні гаворыцца: «Наступны матч адбору да мундыяля-2014 нацыянальная зборная Украіны будзе гуляць без гледачоў (г.зн. матч супраць Польшчы ў Харкаве) Таксама камітэт вырашыў, што зборнай Украіны будзе забаронена гуляць на «Арэне-Львоў» да канца адбору чэмпіянату свету-2018.
Таксама дысцыплінарны камітэт ФІФА пастанавіў накласці на ФФУ штраф у памеры 45 тысяч швейцарскіх франкаў (крыху менш за 50 000 даляраў ЗША).
Дысцыплінарная справа па гэтым пытанні была адкрыта ў выніку паведамленняў арбітра матча і дэлегатаў аб некалькіх інцыдэнтах, звязаных з выкарыстаннем піратэхнікі, аб наяўнасці неанацысцкіх сцягоў на трыбунах, нацысцкага салюту і расісцкіх выказваннях.