Brytanskaja kampanija INSTID paśla «brendu» Minska raspracoŭvaje brend Jerevana
Brytanskaja kampanija INSTID (jaje pradstaŭnik u Jerevanie - brendynhavaje ahienctva Maeutica) była zaprošanaja ŭ Armieniju dla ŭdziełu ŭ raspracoŭcy brendu Jerevana.
17.10.2013 / 01:41
Śpiecyjalisty Maeutica i INSTID pry pasiarednictvie meryi i sfarmavanaj miascovymi dyzajnierami, skulptarami i mastakami Mastackaj rady pracujuć nad prahramaj «Jerevan brend», nakiravanaj na pierśpiektyŭnaje raźvićcio brendu stalicy. Pra toje, što zroblena ŭ hetym napramku i jakim budzie brend Jerevana, raskazaŭ dyrektar INSTID Alaksandr Hrand.
- Vy skazali, što samaje hałoŭnaje ŭ Jerevanie - heta nie jaho staražytnaść abo historyja, a jaho viečnaść, adkul vyciakaje formuła «Modern Form - Eternal Substance» («Sučasnaja forma - viečny źmiest»). Možna bolš padrabiazna raskryć hetuju ideju?
- «Modern Form, Eternal Substance» - klučavaja ideja brendu. Jana patrebnaja, pa-pieršaje, dla taho, kab rastłumačyć ludziam, što horad ź siabie ŭjaŭlaje, čym žyvie i čym dychaje, i, pa-druhoje, kab dać kirunak raźvićciu horada. Kali raskryć dužki, to havorka idzie pra toje, što asnoŭnyja pryncypy praŭdzivaj armianskaj tradycyi pavinnyja być zachavanyja, vyvučanyja, aktualizavanyja i ŭžytyja ŭ sučasnych formach žyćcia. Heta značyć, hetyja tradycyi pavinny prymianiacca, da prykładu, u veb-asiaroddzi, u sučasnaj muzycy, i hetak dalej. Pry hetym treba być intehravanym u hłabalnyja pracesy, nie zakryvacca ad śvietu. Takim čynam, nieabchodna vytrymlivać bałans, što składana, ale nieabchodna. Kali kiraŭnictva horada i haradžanie zdolejuć kiravacca hetaj idejaj, heta daść Jerevanu vialikuju foru i dazvolić jamu realizavacca.
- Adnym z apošnich prajektaŭ INSTID była raspracoŭka brendu Minska. Pracujučy nad im, vy vyvieli, što klučavaja ideja hetaha horada - umieńnie analizavać, krytyčna i niestandartna dumać, heta značyć, jon pradstaŭleny jak «horad intelektu». Jakaja klučavaja ideja Jerevana, i jakija admietnyja rysy ŭ hetaha horada?
- Ź Minskam zusim inšaja historyja: nieabchodna ŭličvać, što jon byŭ pabudavany ŭ hołym poli, što jaho budavali navat nie stolki biełarusy, kolki pradstaŭniki praktyčna ŭsich savieckich respublik. Navat kali ŭziać Minsk i Biełaruś, to ŭ ich roznyja identyčnaści. A Jerevan - heta «armianskaść» u skancentravanym urbanistyčnym vyhladzie. U vypadku ź Minskam my vyznačyli, što tam daminuje racyjanalnaje myśleńnie, chutkaje i efiektyŭnaje rašeńnie lubych zadač, usio pracuje jak hadzińnik. Što da Jerevana, to tut jość hłybinia i čas, ale jano nikudy nie idzie, tut niama nijakich dedłajnaŭ. U Jerevanie, u adroźnieńnie ad Minska, taksama jość hłybinia, i heta daje samy vialiki resurs dla raźvićcia. U hetym sensie tut bolš enierhii i patencyjału.