Biełaruski partyzan: U Maskvie sprabavali zatrymać mieniedžara BKK
U KDB hetuju infarmacyju nie prakamientavali.
25.10.2013 / 15:09
Supracoŭniki biełaruskich śpiecsłužbaŭ sprabavali zatrymać u Maskvie Dźmitryja Samojłava.
Skandalnaja historyja adbyłasia na dniach u rasijskaj stalicy, paviedamlajuć adrazu niekalki infarmacyjnych krynic.
U Maskvie pry pasadcy na ciahnik u Sankt-Pieciarburh da byłoha mieniedžara Biełaruskaj kalijnaj kampanii padyšli čatyry čałavieki ŭ cyvilnym.
Pierakanaŭšysia ŭ tym, što pierad imi mienavita toj čałaviek, apieratyŭniki pad pahrozaj hvałtu źniali Jaŭstratava ź ciahnika i pasprabavali vyvieści z terytoryi Leninhradskaha vakzała.
Adnak na aburanyja kryki zatrymanaha padyšli supracoŭniki rasijskaj palicyi. U vyniku, usia hrupa vymušana była prajści ŭ miascovaje adździaleńnie palicyi.
Tam ludzi ŭ cyvilnym pradjavili order na aryšt byłoha supracoŭnika BKK. Adnak, pakolki hety order byŭ aformleny nienaležnym čynam, to advakatam udałosia adbić zatrymanaha.
Nahadajem, čaćviora top-mieniedžaraŭ ZAT «Biełaruskaja kalijnaja kampanija» Aleh Piatroŭ, Kanstancin Saładoŭnikaŭ, Ihar Jaŭstrataŭ i Dźmitryj Samojłaŭ adšukvajucca ŭ ramkach rasśledavańnia kryminalnych spraŭ, zaviedzienych Hienieralnaj prakuraturaj Biełarusi pa č.3 art.424 «Złoŭžyvańnie ŭładaj i słužbovymi paŭnamoctvami».
Adzin ź fihurantaŭ spravy — staršynia naziralnaj rady ZAT BKK Uładzisłaŭ Baŭmhiertnier — byŭ zatrymany ŭ Minsku i źmieščany pad vartu. Praź niekatory čas jaho pieraviali pad chatni aryšt.
Paźniej karespandentu radyjo «Svaboda» kiraŭnik presavaj słužby KDB Artur Strech zajaviŭ: «Čutki my nie kamientujem. Ci mała chto što napisaŭ. My nie dajom nijakich kamientaroŭ».