Bieł-čyrvona-biełyja ściahi na «Maršy za svabodu» ŭ Maskvie
Tysiačy žycharoŭ rasijskaj stalicy vyjšli na akcyju salidarnaści z palitviaźniami.
28.10.2013 / 01:40
Nad kałonaj byli bačnyja i zabaronienyja biełaruskija nacyjanalnyja ściahi. U šeści ŭziali ŭdzieł našyja suajčyńniki, jakija žyvuć u Maskvie.
Šeście apazicyi «Marš za svabodu» ŭ padtrymku abvinavačanych u «bałotnaj spravie» i inšych palitviaźniaŭ prajšoŭ u centry rasijskaj stalicy. Uzhodnienaja z uładami kolkaść udzielnikaŭ — da 20 tysiač.
Arhanizatarami akcyi vystupili «Kamitet pratestnych dziejańniaŭ» i «Kamitet 6 traŭnia». Ludzi, jakija sabralisia na Puškinskaj płoščy, prajšli pa Strastnym, Piatroŭskim, Kaladnym, Srecienskim bulvarach da pierasiačeńnia Turhienieŭskaj płoščy z praśpiektam Akademika Sacharava.
U rukach va ŭdzielnikaŭ siońniašniaha maršu fatahrafii Michaiła Chadarkoŭskaha, Maryi Alochinaj, byłoha mera Jarasłaŭla Jaŭhiena Urłašova, prychilniki jakoha ŭtvaryli asobnuju kałonu, a taksama fihurantaŭ kryminalnaj spravy ab biesparadkach na Bałotnaj płoščy. U kałonach išli prychilniki ruchu «Solidarnosť», partyj RPR-PARNAS, «Jabłoko».
Za paradkam sačyła amal try tysiačy supracoŭnikaŭ palicyi, vajskoŭcaŭ unutranych vojskaŭ, družyńnikaŭ, u pavietry palicejski viertalot. Kab trapić na šeście, jaho ŭdzielnikam daviałosia prajści praz 40 stacyjanarnych ramak mietaładetektaraŭ. U suviazi z akcyjaj abmiežavany ruch aŭtatranspartu.