U Hrodnie złodziej abakraŭ nastaŭnicu prosta ŭ kłasie
30.12.2013 / 17:03
Złodziej zajšoŭ u kłas padčas pieramieny, pavitaŭsia z vučniami i, pradstaviŭšysia znajomym nastaŭnicy, zalez u jaje sumku, skraŭ kala 1 młn rubloŭ i syšoŭ.
Nastaŭnica, viarnuŭšysia ŭ pačatku ŭroka, vyklikała milicyju.
Heta ŭžo druhi taki vypadak za apošni čas.
Raniej nieviadomy złamyśnik anałahičnym čynam skraŭ hrošy ŭ rabočaj dziciačaha sadka. Taki počyrk złačynstvaŭ śviedčyć, što abodva — na sumleńni adnaho i taho ž čałavieka.
Złodziej pakul nie znojdzieny.