На беларускіх складах засталося хакейных сувеніраў на 9 млрд
Гаворка ідзе пра непрададзеную беларускую прадукцыю з лагатыпам сёлетняга чэмпіянату свету па хакеі.
30.01.2014 / 09:05
Пра гэта паведаміў старшыня Федэрацыі хакея і кіраўнік дырэкцыі па правядзенні чэмпіянату свету Яўген Ворсін, піша «Прессбол».
Чыноўнік нагадаў, што за тры месяцы да чэмпіянату, гэта значыць 9 лютага, Беларусь абавязаная зняць з продажу ўсю прадукцыю з лагатыпам чэмпіянату свету. З гэтага часу будзе прадавацца толькі прадукцыя шведскай кампаніі. Такое патрабаванне выставіла міжнародная хакейная федэрацыя.
На складах застаецца нерэалізаваная прадукцыя прыкладна на 9 мільярдаў рублёў. Беларусь можа прадаваць сувеніры без лагатыпа чэмпіянату, але толькі не там, дзе прадаюць афіцыйныя партнёры. Напрыклад, у фан-зонах або ўнутры арэн беларускія сувеніры прадавацца не будуць.
Рэшту сувеніраў беларускі гандаль паспрабуе прадаць пасля заканчэння турніру.