Kuleš i pieśni: jeŭramajdan u Lvovie. Repartaž «Našaj Nivy»
30.01.2014 / 12:36
Barykady ŭ Lvovie źjavilisia 24 studzienia paśla taho, jak aktyvisty Jeŭramajdanu zaniali Lvoŭskuju abłasnuju administracyju.
Ukrainskamu mužčynu treba dva miesiacy, kab prybić paličku na kuchni, i dźvie hadziny, kab pabudavać barykady.
Taki žart zaraz papularny va Ŭkrainie, chacia ŭ dačynieńni da barykad heta prosta kanstatacyja faktaŭ.
«Budavali chutka i svaimi siłami. Tolki moładź: mnie 22 hady i ja byŭ adnym z najstarejšych!» — uzhadvaje student Nazar.
— Tituška?
— Ta ni, žurnalistka ź Biłorusi!
— Ź Biłorusi? Nu to pidiemo, divčinko, čaju popjemo!
Tak sustrakajuć mianie ruplivyja abaroncy štabu Narodnaj Rady. «Roznaje zdarajecca, — tłumačać jany, — voś učora [28.01] pryjšli vidavočna pravakatary: kryčali, pravy kačali, chacia napačatku kazali, što žurnalisty».
Mianie ŭsio ž puskajuć na toj bok barykad, dzie šerahi aktyvistaŭ ździŭlajuć svajoju starakataściu: tut i studenty, što paśpiavajuć rychtavacca da ispytaŭ, i pavažnyja lvoŭskija spadary, i maleńkija dzieci, i śviatary.
«Raniej ja na Majdan nie chadziŭ, — kaža Andrej (na nižnim fota sprava), — ale paśla pryniaćcia dyktatarskich zakonaŭ 16 studzienia ŭnutry ŭsio zakipieła! Ja tut užo amal tydzień».
Pra pobyt na barykadach taksama dbajuć. Poruč i palavaja kuchnia, dzie hatujuć harbatu dy kazacki kuleš, i narychtoŭka drovaŭ, kab ludzi nie źmierźli.
Niepasredna ŭ pamiaškańni abłrady znachodzicca miedpunkt z asobnaj achovaj, a taksama tut dziaŭčaty hatujuć dla majdanaŭcaŭ buterbrody dy zavarvajuć kavu/čaj, jakimi potym častujuć ludziej na barykadach. Pradukty dy miedykamienty ŭ vialikich kolkaściach prynosiać žychary Lvova.
Bližej da nočy prychodzić novaja źmiena. Ludzi viačerajuć kulašom (duža smačnym! Mianie im taksama pačastavali!) dy, zhurtavaŭšysia pobač z vohniščam, baviać čas za razmovami j śpievami. «My budziem tut da ranku. Heta ŭžo naš dom. Tut volna dychajecca», — kaža Nazar.