23-hadovaja himnastka Ksienija Sankovič – chto palacieŭ u Sočy ŭ kampanii Łukašenki? FOTY
12.02.2014 / 16:50
foty z archivu Ksienii Sankovič, pradastaŭlenyja partałam pressball.by i goals.by
«Svaja» ŭ salidnaj kampanii
Chakiejny trenier Michaił Zacharaŭ, śviatar Fiodar Poŭny, tenisist Siarhiej Ciacieryn, miljaniery Alaksandr Šakucin i Juryj Čyž… – skład «kamandy», razam ź jakoj Alaksandr Łukašenka vyjazdžaje na harnałyžny adpačynak, zbolšaha stabilny. Darečy, usie jany — žychary elitnych Drazdoŭ.
Ale na śviatočnym «čajapićci» ŭ honar pieramohi bijatłanistki Darji Domračavaj siarod haściej možna było paznać jašče adzin tvar. U salidnaj kampanii apynułasia himnastka Ksienija Sankovič.
Pryčym dziaŭčyna nie prosta saramliva ŭśmichałasia ŭ baku, a navat pramoviła tost.
Hladzieć z 3:40
«Za žančyn, u jakich jość mužčynski charaktar! Tamu ŭ dobrym sensie ŭsim vam, dziaŭčonki, jakija siońnia zmahalisia, u niejkaj stupieni taksama mieć mužčynskuju žyłku, jakaja dapamahaje vam pieramahać», — uźniała kielich Ksienija Sankovič.
Alimpijskaja pryziorka
Spartyŭnyja dasiahnieńni Ksienii dobra viadomyja zaŭziataram. Na letniaj Alimpijadzie ŭ Piekinie jana vyjhrała bronzavy miedal, a ŭ Łondanie – srebra.
Ksienija Sankovič — treciaja źleva.
Uražańni ad spabornictvaŭ byli niezabyŭnyja. «Usie kazali, što budziem žyć u Alimpijskaj vioscy. I ja čamuści padumała, što my realna žyć budziem u niejkaj vioscy, jak voś u nas u Biełarusi. A potym pryjechała, ubačyła i padumała: «Uch. ni fiha sabie vioska!» - kazała Ksienija ŭ intervju Tribuna.com (Goals.by).
Abiedźvie ŭznaharody Sankovič atrymała ŭ hrupavych praktykavańniach.
Cikavy i finansavy aśpiekt paśpiachovych vystupleńniaŭ. Pieramohi prynieśli himnastkam $30 tysiač u 2008 hodzie i $75 tysiač u 2012-m.
Ciapier Ksienii idzie 24-y hod. Dla mastackaj himnastyki heta zamnoha, tamu ŭ kancy 2012-ha dziaŭčyna skončyła karjeru, sastupiŭšy placoŭku jašče maładziejšym.
Himnastka-miljanierka
Kali ŭ pošukavaj sistemie Google nabrać pa-rusku «Ksienija Sankovič», razumnaja mašyna adrazu vydaść padkazku «… i Juryj Čyž». Čamu? Huhłu lepš viedać.
Ksienija Sankovič ź Juryjem Čyžom (sprava) i Uładzimiram Japryncavym (źleva)
Ale peŭnuju suviaź himnastki z samych bahatym biełaruskim biznesoŭcam možna znajści. Sankovič pazaletaś nabyła kvateru ŭ skandalna viadomym domie «La Trajeckaha», jaki budavaŭ «Trajpł» Juryja Čyža.
Ciapier himnastka – ułaśnica hihanckaj adnapakajoŭki sa svabodnaj płaniroŭkaj. 223 m2 ahulnaj płoščy — heta amal jak piać standartnych minskich dvuchpakajovak. Rynkavaja cana takoj kvatery, kali pahladzieć anałahičnyja prapanovy, moža siahać $750 tysiač.
Čamu jana vyrašyła nabyć kvateru mienavita ŭ hetym domie? «Składana adkazać. Niejak zachaciełasia, voś i nabyła», – pryznałasia Sankovič karespandentu Tribuna.com.
Ale ŭ novaj kvatery himnastka pakul nie žyvie. Usio ž ramont — doŭhaja sprava. Dyj žyllo «La Trajeckaha» — nie adzinaja nieruchomaść Ksienii.
Niekalki hadoŭ tamu jana stała haspadyniaj trochpakajoŭki ŭ adnym z novych damoŭ pa vulicy Prytyckaha, kala stancyi mietro «Kuncaŭščyna». Taja kvatera aceńvajecca na rynku minimum u $110 tysiač. Viadoma ž, pry budaŭnictvie jana kaštavała Sankovič značna tańniej.
Jak minimum $860 tysiač nieruchomaści — dobry pačatak dla maładoj dziaŭčyny.
Tata-rekardsmien i tata-advakat
U Ksienii Sankovič niaprostyja baćki. Jaje tata Andrej Sankovič kaliści sam zajmaŭsia sportam. Jahony nacyjanalny rekord pa skačkach u vyšyniu dahetul nie pabity.
U 1993-m Sankovič-starejšy skočyŭ na 2,34 m. Adnak karjera ŭ spartoŭcaŭ niadoŭhaja, tamu Andrej u vyniku abraŭ bolš pierśpiektyŭnuju prafiesiju — advakata.
«Jon prychodziŭ dachaty i raspaviadaŭ pra svaje spravy. Ja zaŭsiody, adkryŭšy rot, słuchała. Viadoma, padzialiłasia b cikavymi historyjami, ale advakackaja tajamnica baćki nie dazvalaje razbałbatacca». Niališnim budzie nahadać, što padrabiaznaści spravaŭ svaich padabaronnych advakat nie musić raskazvać nikomu, dla dački vyklučeńnie nie robicca taksama.
U 2011-m Sankoviča abirali staršynioj Minskaj haradskoj kalehii advakataŭ. Adnak Ministerstva justycyi pryznała schod nielehitymnym, na chvali cisku na advakackuju supolnaść.
Darečy, Andrej Sankovič abaraniaŭ u sudzie fihuranta kryminalnaj spravy ab masavych biesparadkach Dźmitryja Novika. Chłopiec častkova pryznaŭ vinu i byŭ asudžany na 3,5 hoda. Praz paŭhoda jon byŭ vyzvaleny.
Studentka hoda
Ksienija vyrašyła pajści pa šlachu baćki. Sioleta jana davučyłasia na jurydyčnym fakultecie BDU. Pryčym adukacyju atrymlivała na dzionnaj formie navučańnia. Praz spabornictvy ekzamieny čaściakom davodziłasia zdavać sa spaźnieńniem, pryznavałasia jana.
Dla ŭniviersiteta takija studenty — znachodka, bo spartyŭnyja spabornictvy pamiž VNU nichto nie admianiaŭ. Niadziva, što padčas vučoby Ksienija atrymlivała ŭznaharodu «Studentka hoda» ŭ naminacyi «Sport».