Makiej: Biełaruś zacikaŭlena ŭ zachavańni Ukrainy niezaležnaj i terytaryjalna cełasnaj
28.02.2014 / 12:48
mfa.gov.by
Biełaruś zacikaŭlena ŭ tym, kab Ukraina zastavałasia suvierennaj, niezaležnaj, terytaryjalna cełasnaj dziaržavaj.
Ab hetym zajaviŭ žurnalistam ministr zamiežnych spraŭ Biełarusi Uładzimir Makiej pa vynikach sustrečy 27 lutaha ŭ Ryzie z kiraŭnikom źniešniepalityčnaha viedamstva Łatvijskaj Respubliki Edharsam Rynkievičsam.
Uładzimir Makiej padkreśliŭ: «My niehatyŭna aceńvajem toje, što adbyvajecca ciapier va Ukrainie.
Ukraina - naš paŭdniovy susied, u nas u minułym hodzie tavaraabarot byŭ $7 młrd, u pazaminułym - $8 młrd. My ciesna źviazany handlova-ekanamičnymi suviaziami i havorym praktyčna na adnoj movie - razumiejem adzin adnaho, kali razmaŭlajem na ŭkrainskaj abo biełaruskaj movach, našy narody absalutna blizkija. Tamu my ŭsprymajem toje, što adbyvajecca va Ukrainie, ja skazaŭ by, jak trahiedyju i, zrazumieła, škadujem ab achviarach va Ukrainie. My abmiarkoŭvali heta pytańnie. My zacikaŭleny ŭ tym, kab Ukraina zastałasia suvierennaj, niezaležnaj, terytaryjalna cełasnaj dziaržavaj».
Jon pradoŭžyŭ: «Nie varta, napeŭna, ciapier viartacca ŭ minułaje i havaryć ab tym, chto maje racyju, a chto vinavaty, ale ja liču, što na niejkim etapie - da Vilenskaha samitu «Uschodniaha partniorstva» abo adrazu paśla jaho — mahli b być zrobleny adpaviednyja kroki, jakija nie dapuścili b hetaj trahiedyi.
Heta datyčycca ŭsich bakoŭ, uklučanych u hety praces. Ale adbyłosia toje, što adbyłosia. Ciapier, jak nam zdajecca, samaje hałoŭnaje - adnavić stabilnaść, nie dapuścić dalejšaha krovapralićcia, zabiaśpiečyć funkcyjanavańnie adpaviednych orhanaŭ ułady, jakija pavinny być lehitymnymi. Samaje važnaje - zachavać terytaryjalnuju cełasnaść, suvierenitet i niezaležnaść Ukrainy». Uładzimir Makiej skazaŭ, što Biełaruś zychodzić z taho padychodu, što Ukraina - vielmi važny jaje partnior.
Adkazvajučy na pytańni žurnalistaŭ adnosna čutak, byccam asobnyja saratniki Janukoviča mohuć znachodzicca ŭ Biełarusi, ministr zamiežnych spraŭ adznačyŭ:
«Što datyčycca znachodžańnia ŭ Biełarusi prychilnikaŭ Janukoviča, kali b my byli ŭpeŭnieny u tym, što ludzi praśledujucca niezakonna abo tolki za ich palityčnyja pierakanańni - naprykład, jak ciapier heta robicca adnosna Kamunistyčnaj partyi Ukrainy, kali była razhromlena štab-kvatera abo dom kiraŭnika Kampartyi, adnosna inšych palityčnych sił, - kali b my byli ŭpeŭnieny, što takija praśledavańni adbyvajucca tolki pa farmalnych pryčynach, tamu što ludzi majuć zusim inšyja palityčnyja pohlady, my, mahčyma, i pradastavili b palityčnaje prystanišča takim asobam. Ale da nas nichto za pradastaŭleńniem palityčnaha prystanišča nie źviartaŭsia. Nakolki mnie viadoma, prychilnikaŭ Janukoviča na našaj terytoryi niama».
Adno z pytańniaŭ datyčyłasia taho, jak biełaruskaja armija ŭdzielničaje abo budzie ŭdzielničać u vučeńniach rasijskich vojskaŭ na paŭdniova-zachodnim fłanhu Rasii.
U suviazi z hetym Uładzimir Makiej skazaŭ: «Pa pytańni arhanizacyi vučeńniaŭ Uzbrojenych sił Rasii źviartajciesia, kali łaska, u rasijski hienštab, my da hetaha nijakaha dačynieńnia nie majem». Pry hetym jon adznačyŭ, što Uzbrojenyja siły Biełarusi ŭ ramkach Sajuznaj dziaržavy majuć adpaviednyja pahadnieńni z Uzbrojenymi siłami Rasii i pieryjadyčna pravodziać sumiesnyja vučeńni, na jakija zaprašajucca mižnarodnyja nahladalniki, tak było ŭ minułym hodzie.
Ministr taksama adznačyŭ: «Situacyja na paŭdniovych hranicach vyklikaje ŭ nas zaniepakojenaść u suviazi z tym, što ŭ ruki šeraha asob trapiła vialikaja kolkaść zbroi, u tym liku z arsienałaŭ MUS i Uzbrojenych sił Ukrainy, i nieviadoma, dzie heta zbroja moža apynucca. Ukraina - heta nie Siryja, nie Livija, jakija znachodziacca daloka ad Jeŭropy.
Ukraina znachodzicca na hranicy ź Jeŭrapiejskim sajuzam. Naša ahulnaja, ja liču, zadača ŭ tym, kab hety ŭnutrany ŭkrainski kanflikt jak maha chutčej byŭ zavieršany i kab tam ustalavałasia spakojnaje, narmalnaje, mirnaje žyćcio».