Biełarusy, lubicie svaich mastakoŭ: słova Apostalskaha Nuncyja na raźvitańnie z Ryhoram Baradulinym
05.03.2014 / 10:30
«Vieru, što biełarusy, jakija razam ź inšymi śviatymi žyvuć u źziańni Božaha śviatła, vyjduć jamu nasustrač, kab padvieści jaho da Boha. I, być moža, Boh pryvitaje jaho ŭ svaim domie prostymi słovami, jakimi biełaruskaje serca vitaje haściej: «Kali łaska, Ryhor»», — takija słovy Apostalski Nuncyj u Biełarusi arcybiskup Kłaŭdyjo Hudžeroćci skiravaŭ na Imšu raźvitańnia z Ryhoram Baradulinym, jakaja prajšła 4 sakavika ŭ minskim kaściole śviatych Symona i Aleny.
fota Tut.by
U toj momant, kali Kaścioł addaje apošniuju ziamnuju pašanu vialikamu paetu, daviarajučy jaho miłasernaj lubovi Boha, prahnu i ja malicca razam z vami.
Hłybokaje i tonkaje mastactva Ryhora Baradulina - heta hołas maŭklivaj dušy biełaruskaha naroda. U im paezija i duchoŭnaść jadnajucca ŭ mocnych abdymkach. Tamu nieruchomaje maŭčańnie jahonaha niežyvoha cieła moža ŭsprymać jak apošni žest tvorčaści hetaha chryścijanina i paeta.
Mova — heta instrumient, jakim karystajecca Boh, kab razmaŭlać z narodam.
Tamu jana śviataja i vartaja, kab jaje šanavali i lubili, jak maci. Na hetym instrumiencie Ryhor Baradulin umieŭ vykonvać dzivosnyja miełodyi i dazvoliŭ biełaruskamu narodu svajoj movaj dakranucca da vyšyń pryhažości.
Baradulin chacieŭ taksama, kab šlachietnyja paety inšych kultur mahli paŭtaryć svaje śpievy na biełaruskaj movie.
Razam ź inšymi niezvyčajnymi aŭtarami jon pryčyniŭsia da pierakładu «Rymskaha Trypcicha» Jana Paŭła II, jakoha krychu bolš čym praź miesiac Katalicki Kaścioł abvieścić śviatym.
Vieru, što biełarusy, jakija razam ź inšymi śviatymi žyvuć u źziańni Božaha śviatła, vyjduć jamu nasustrač, kab padvieści jaho da Boha. I, być moža, Boh pryvitaje jaho ŭ svaim domie prostymi słovami, jakimi biełaruskaje serca vitaje haściej: «Kali łaska, Ryhor».
Darahija biełarusy, lubicie vašych mastakoŭ — vialikich i šmatlikich.
Jany vučać vas uzdymać svaje vočy ŭhoru, da Boha nadziei, da žyvatvornaha sonca, jakoje źziaje ŭ vašym viečna pryvabnym niebie, abudžajučy ŭ vas siły da štodzionnaha ŭvaskrasieńnia.
Boža, błahasłavi Biełaruś i jaje narod, ź jaho davierlivaj movaj i piaščotnymi śpievami.