ES vydzialaje Ukrainie 11 młrd jeŭra biazvypłatnaj dapamohi i kredytaŭ

dapoŭniena

05.03.2014 / 14:42

Jeŭrasajuz hatovy vydzielić Ukrainie 11 miljardaŭ jeŭra finansavaj dapamohi na praciahu bližejšych dvuch hadoŭ.

Pra heta zajaviŭ staršynia Jeŭrakamisii Žaze Manuel Barozu. Adpaviednaja zajava źjaviłasia na sajcie Jeŭrakamisii.

Umovaj atrymańnia dapamohi budzie stvareńnie kaalicyjnaha ŭrada, u jaki pavinny ŭvajści pradstaŭniki ŭsich palityčnych siłaŭ, skazaŭ Barozu.

Napiaredadni ekstrannaha samita krain Jeŭrasajuza Barozu zajaviŭ: «My ŭsie viedajem, što staić na kanu. My sutyknulisia z pahrozaj nie tolki stabilnaści, ale navat miru na našym kantyniencie».

Hrošy buduć sabrany z roznych krynic: Jeŭrapiejskaha banka rekanstrukcyi i raźvićcia, Jeŭrapiejskaha inviestycyjnaha banka, srodkaŭ Jeŭrakamisii dy pa inšych linijach.

Jašče miljard dalaraŭ vydzialajuć Ukrainie ZŠA. U dadatak, dapamohu nadaduć Kanada, Japonija, Paŭdniovaja Kareja i asobnyja krainy-členy Jeŭrasajuza.

I, narešcie, jak čakajecca, 15 miljardaŭ dalaraŭ Ukraina atrymaje ŭ vyhladzie maksimalna nizka apracentavanych pazyk Mižnarodnaha valutnaha fondu i Suśvietnaha banka.

Ahulnaja suma dapamoha moža skłaści kala 35 miljardaŭ dalaraŭ.

Pakiety dapamohi buduć iści ŭzamien za zaćvierdžanuju MVF prahramu azdaraŭleńnia ŭkrainskaj ekanomiki i palityčnyja reformy, skiravanyja na niedapuščeńnie karupcyi i zabieśpiačeńnie niezaležnaści sudovaj ułady.

Takuju maštabnuju, u praporcyi da VUP, dapamohu z krain byłoha SSSR raniej atrymlivali tolki dziaržavy Bałtyi.

Jak čakajecca, Jeŭrasajuz zamarozić kapitały Viktara Janukoviča i jašče 15 čynoŭnikaŭ byłoha režymu.

Što da sankcyj adnosna Rasii ci reakcyi na Krymski kryzis, to rašeńnie samita ES budzie zaležać ad vynikaŭ sustrečy ministraŭ zamiežnych spraŭ Budapiešckaha miemarandumu, što adbyvajecca siońnia ŭ Paryžy.