Lidar Siryi Bašar Asad pachvaliŭ Pucina za «miralubnaść» adnosna Ukrainy
06.03.2014 / 21:45
Prezident Siryi Bašar Asad ŭ čaćvier vykazaŭ salidarnaść ź dziejańniami prezidenta Rasii Uładzimira Pucina ŭ suviazi ź situacyjaj va Ukrainie.
«Prezident Bašar Asad nakiravaŭ Uładzimiru Pucinu telehramu, u jakoj ad svajho imia i ad imia siryjskaha naroda vykazaŭ salidarnaść ź jaho namahańniami pa adnaŭleńni biaśpieki i stabilnaści ŭ siabroŭskaj dziaržavie Ukrainie ŭ śviatle sproby pieravarotu suprać zakonnaści i demakratyi na karyść radykałaŭ i terarystaŭ», — adznačajecca ŭ paviedamleńni.
Jon taksama adznačyŭ, što Damask padtrymlivaje «racyjanalny i miralubivy padychod rasijskaha prezidenta, jaki imkniecca da suśvietnaj sistemy, jakaja padtrymlivaje stabilnaść i baraćbu z teraryzmam».
Bašar Asad źjaŭlajecca lidaram Siryi z 2000 hoda. Try hady tamu paśla žorstkaha padaŭleńnia im antyŭradavych pratestaŭ u krainie pačałasia maštabnaja hramadzianskaja vajna, padčas jakoj, pavodle acenak AAN, zahinuli bolš za sto tysiač čałaviek.
U kanflikcie, vierahodna, z abodvuch bakoŭ ŭžyvali chimičnuju zbroju, što ledź nie stała padstavaj dla vajennaj interviencyi ŭ Siryi z boku ZŠA. Adnak praz dypłamatyčnuju padtrymku Rasii siryjski ŭrad abviaściŭ pra admovu ad chimzbroi i jaje ŭtylizacyju pad mižnarodnym kantrolem.
Zaraz hramadzianskaja vajna ŭ Siryi praciahvajecca.
Asad faktyčna staŭ pieršym lidaram niezaležnaj dziaržavy, jaki padtrymaŭ Pucina. Raniej ab padtrymcy de-fakta padziei ŭvodu vojskaŭ va Ukrainu zajaŭlali tolki kiraŭnik Čačni Ramzan Kadyraŭ i skinuty eks-prezident Ukrainy Viktar Janukovič.