Maryjuš Maškievič: Palityka Polščy da Biełarusi nia źmienicca
Adnak ci budzie padtrymka dla telekanału «BiełSat»?
23.10.2007 / 12:13
Na daterminovych parłamienckich vybarach u Polščy pieramahaje partyja “Hramadzianskaja płatforma”. Na dumku Maryjuša Maškieviča, byłoha polskaha ambasadara ŭ Minsku, dla Biełarusi heta ničoha istotna nie źmienić:
“Što tyčycca źniešniaj palityki ŭ adnosinach da Biełarusi, dyk nijakich źmienaŭ nia budzie. Taktyka, raspracavanaja dva hady tamu, budzie praciahvacca. Maksimum – heta niejkija kaśmietyčnyja źmieny, jakija buduć zaležać ad asoby ministra zamiežnych spravaŭ”, -- zajaviŭ Maškievič “Jeŭraradyjo”.
Cikava, što mahčymy budučy premjer-ministr Polščy Donald Tusk maje status nieŭjaznoha ŭ našuju krainu. U śniežni minułaha hoda jamu admovili va ŭjeździe ŭ Biełaruś, kudy jon źbiraŭsia pa zaprašeńni Sajuza palakaŭ Biełarusi. Spadar Maškievič raskazaŭ, što šmat chto z polskich aficyjnych asobaŭ nie moža naviedać Biełaruś:
“Jon užo naviedvaŭ Biełaruś, ale na druhi raz jaho nie ŭpuścili. Ja taksama nie ŭjazny ŭ Biełaruś, dyj šmat chto z polskich aficyjnych asobaŭ majuć taki status. Dyj naŭrad ci Tusk zachoča jechać da Sidorskaha”.
U Ministerstvie zamiežnych spravaŭ Biełarusi pakul nijak nie kamientujuć nieŭjazny status Donalda Tuska.
Bohdan Klich, deputat Jeŭraparłamientu ad partyi “Hramadzianskaja płatforma”, u intervju “Jeŭraradyjo” taksama paćvierdziŭ, što źniešniaja palityka ŭ dačynieńni da Biełarusi nie źmienicca. Tak, naprykład, spadar Klich zapeŭniŭ, što prahrama imia Kalinoŭskaha dla represavanych u Biełarusi studentaŭ i nadalej budzie pracavać u Polščy:
“Ja całkam pierakanany, što prahramy, jakija byli skiravanyja na adpaviednyja asiarodździ, a mienavita na tych, chto stvaraje hramadzianskuju supolnaść u Biełarusi, buduć praciahvacca i nadalej”.
Nakont biełaruskaha niezaležnaha telekanała “Biełsat”, jaki dahetul łabiravała partyja “Prava i spraviadlivaść”, deputat Klich nie śpiašajecca niešta havaryć da taho momantu, pakul nie budzie stvorana kaalicyja dla ŭtvareńnia ŭrada:
“Z adkazam na hetaje pytańnie treba pačakać, pakul nie stvorycca novy parłamient, stvorycca kaalicyja i buduć naznačanyja kiraŭniki na kankretnyja pasady”, – havoryć adzin ź lideraŭ partyi – pieramožcy vybaraŭ u Polščy.