Biełaruś hatova zabiaśpiečyć Mazambik adnosna tannymi traktarami
25.04.2014 / 21:28
25 krasavika pieršy namieśnik premjer-ministra Biełarusi Uładzimir Siamaška sustreŭsia z delehacyjaj Mazambika na čale ź ministram zamiežnych spraŭ i supracoŭnictva Ałdemira Bałojem, paviedamlaje pres-słužba biełaruskaha ŭrada.
«U Biełarusi i Mazambika jość značny patencyjał dla ŭzajemavyhadnaha supracoŭnictva ŭ samych roznych halinach, u pieršuju čarhu ŭ sielskahaspadarčaj i pramysłovaj vytvorčaści, śfiery adukacyi, — skazaŭ Siamaška. — U 2013 hodzie tavaraabarot pamiž krainami vyras u 3,4 razu, ale absalutnaja ličba (9,1 młn. dołaraŭ, u tym liku ekspart 8,7 młn. dołaraŭ) vielmi małaja. My možam pavialičyć jaje ŭ dziasiatki, a to i ŭ sotni razoŭ».
Kala 24% VUP Mazambika farmirujecca sielskahaspadarčaj vytvorčaściu — heta pryjarytetnaja dla krainy halina. Pieršy vice-premjer adznačyŭ, što Biełaruś mahła b zabiaśpiečyć sielskuju haspadarku Mazambika traktarami — «adnosna tannymi pa suśvietnych mierkach i pry hetym nadzvyčaj nadziejnymi, jakija adkazvajuć usim sučasnym patrabavańniam».
Bolš za toje, padkreśliŭ Siamaška, u Biełarusi vyrablajecca ŭsia liniejka mašyn, miechanizmaŭ i abstalavańnia dla sielskahaspadarčaj vytvorčaści — ad płuhoŭ, siejałak da zbožža- i kormaŭboračnych kambajnaŭ. «Hatovyja pastavić hetu techniku ŭ Mazambik, kali jość u hetym nieabchodnaść», — zapeŭniŭ pieršy vice-premjer.
U kastryčniku 2012 hoda ŭ Mazambiku zarehistravana sumiesnaje pradpryjemstva TAA «BiełAfryka» (suzasnavalniki AfriRent i AAT «Pramahralizinh»), pieršyja pastaŭki techniki ŭžo ažyćciaŭlajucca. Sfarmiravany partfiel na 30 młn. dołaraŭ.
Siamaška ličyć, što havorka moža iści nie tolki pra pastaŭku sielskahaspadarčaj, darožna-budaŭničaj, kamunalnaj techniki, ale i pra arhanizacyju zboračnaj vytvorčaści.
Jon ličyć metazhodnym stvaryć mižuradavuju handlova-ekanamičnuju kamisiju, jakaja b vyznačyła najbolš cikavyja dla abiedźviuch krain prajekty i prasoŭvała ich.
Ministr zamiežnych spraŭ i supracoŭnictva Mazambika adznačyŭ: «Biełaruś — heta kraina, prykład ź jakoj my b chacieli brać». Pavodle jaho słoŭ, sielskaja haspadarka składaje asnovu ekanomiki Mazambika. Pastaŭlena meta pierajści ad drobnaha fiermierstva da bujnych kamiercyjnych sielhasuhodździaŭ. «Dla hetaha nam patrebnyja navučany piersanał i novyja technałohii — usio heta jość u Biełarusi, — padkreśliŭ ministr. — Siarod siektaraŭ, jakija mohuć vyvieści krainu na bolš vysoki ekanamičny ŭzrovień, — handal i sielskaja haspadarka».
Ałdemira Bałoj naviedaŭ Minski traktarny zavod i, jak paviedamlaje pres-słužba biełaruskaha ŭrada, byŭ ździŭleny ŭbačanym: «Adna sprava — statystyka, zusim inšaje — acanić realnyja abjomy i realnyja mahčymaści pradpryjemstva».