Pres-sakratar Pucina nazvaŭ złačyncami ŭsich, chto kvalifikuje kijeŭskija ŭłady jak zakonnyja
03.05.2014 / 12:49
Pres-sakratar prezidenta RF Dźmitryj Piaskoŭ uskłaŭ usiu adkaznaść za padziei ŭ Adesie na ŭkrainskija ŭłady i zajaviŭ, što «złačyncami stanoviacca i tyja, chto kvalifikuje chuntu jak zakonnuju».
«Ułady, jakija znachodziacca ŭ Kijevie, nie prosta niasuć adkaznaść za hetaje złačynstva, ale i źjaŭlajucca pramymi saŭdzielnikami hetych złačynnych dziejańniaŭ — faktyčna, ich ruki ŭžo pa łokać u kryvi. Pryčym, saŭdzielnikam hetaha złačynstvaŭ pastupova stanoviacca i tyja, chto kvalifikuje chuntu jak zakonnuju. My ź vialikim škadavańniem kanstatujem adabreńnie karnaj apieracyi, adabreńnie taho, što robić Kijeŭ adnosna paŭdniova-ŭschodnich rehijonaŭ», — padkreśliŭ Piaskoŭ.
Apraŭdańni apieracyi na paŭdniovym uschodzie krainy, pavodle jaho słoŭ, hłyboka cyničnyja: «Faktyčna našy kalehi na Zachadzie takim čynam apraŭdvajuć zabojstvy, jakija ŭ vialikaj kolkaści my zaraz nazirajem, trahiedyju, jakuju my nazirajem».
U piatnicu pres-słužba viarchoŭnaha pradstaŭnika Jeŭrasajuza pa zamiežnych spravach Ketryn Eštan zajaviła, što va Ukrainie pavinna vykonvacca manapolija dziaržavy na prymianieńnie siły. Prezident ZŠA Barak Abama padtrymaŭ apieracyju ŭkrainskich siłavikoŭ u Słaviansku i skazaŭ, što ŭłady ŭ Kijevie «majuć prava i abaviazak padtrymlivać paradak i zakon».
Alaksandr Łukašenka taksama nie raz padkreślivaŭ, što pryznaje dziejnyja ŭłady Ukrainy lehitymnymi, i sustrakaŭsia z Alaksandram Turčynavym. Jon taksama vykazvaŭ rašučuju padtrymku adzinstvu Ukrainy i dziejańniam na jaho abaronu.