Spravu aktyvista adpravili na dapracoŭku: milicyjanty błytalisia ŭ pakazańniach
14.05.2014 / 19:29
Sprava aktyvista moładzievaj arhanizacyi «Alternatyva» (Łatvija) Aleha Kierula, jakaja razhladałasia 14 maja ŭ sudzie Pieršamajskaha rajona Minska, adpraŭlena na dapracoŭku.
Pavodle infarmacyi pravaabarončaha sajta spring96.org, takoje rašeńnie pa spravie aktyvista pryniaŭ sudździa Juryj Harbatoŭski, jaki vioŭ administracyjny praces. U časie razhladu spravy ŭźnikła šmat sprečnych momantaŭ, bo dvoje śviedak-milicyjantaŭ razychodzilisia ŭ svaich pakazańniach. U vyniku Aleh Kierul byŭ adpuščany z sudu.
Jak raniej paviedamlaŭ BiełaPAN, aktyvist byŭ zatrymany napiaredadni ŭviečary kala Nacyjanalnaj biblijateki. Kierul abvinavačvaŭsia pa artykule 17.1 Kodeksa ab administracyjnych pravaparušeńniach (drobnaje chulihanstva). Pa najaŭnaj infarmacyi, Kierul rasklejvaŭ kala biblijateki ŭlotki salidarnaści z aktyvistami, zatrymanymi pierad čempijanatam śvietu pa chakiei.
Nahadajem, napiaredadni adkryćcia i padčas čempijanatu śvietu pa chakiei ŭ Biełarusi prajšli masavyja previentyŭnyja zatrymańni i aryšty hramadskich aktyvistaŭ. Pa zajavie pravaabaroncaŭ, aktyvistaŭ zatrymlivajuć vyklučna pa sfabrykavanaj i adnatypnych abvinavačvańniach u drobnym chulihanstvie i niepadparadkavańni supracoŭnikam milicyi. Usiaho zatrymana abo aryštavana ŭžo kala 30 čałaviek, niekatorych aktyvistaŭ apazicyi milicyja praciahvaje šukać.