Hałavanaŭ byccam by nia suprać Vajniłoviča

«Heta pravavoje pytańnie», — skazaŭ jon. Minharsaviet moža viarnucca da jaho razhladu i, likvidavaŭšy parušeńni, znoŭ nakiravać rašeńnie dla praviadzieńnia pravavoj ekśpiertyzy, padkreśliŭ ministar justycyi Viktar Hałavanaŭ.

23.11.2007 / 15:02

Pryčynaj admovy Ministerstva justycyi ŭ stanoŭčym zaklučeńni na rašeńnie V siesii Minskaha haradskoha Savieta deputataŭ ad 26 vieraśnia ab pierajmienavańni vulicy Stanisłava Biersana ŭ vulicu zasnavalnika Čyrvonaha kaścioła Edvarda Vajniłoviča, a taksama prysvajeńni prajektujemym vulicam imion narodnaha piśmieńnika Biełarusi Janki Bryla i kanclera Vialikaha kniastva Litoŭskaha Lva Sapiehi stała parušeńnie norm zakanadaŭstva. Ab hetym karespandentu BIEŁTA paviedamiŭ ministr justycyi Biełarusi Viktar Hałavanaŭ.

«Ministerstva razhladaje narmatyŭna‑pravavyja akty, rašeńni miascovych vykanaŭčych orhanaŭ i Savietaŭ tolki na pradmiet adpaviednaści Kanstytucyi i bazavamu zakanadaŭstvu. Pytańni metazhodnaści ich pryniaćcia nie ŭvachodziać u našu kampietencyju», — rastłumačyŭ ministr.

Pry hetym jon dadaŭ, što «ŭ vypadku z rašeńniem Minharsavieta nie było zachavana zakanadaŭstva».

«Pierš čym pierajmianoŭvać abo prysvojvać nazvy novym vulicam, nieabchodna abmierkavać heta z žycharami horada, daviedacca ich dumku, a zatym pradstavić u ministerstva nieabchodnyja dakumienty. Toje, što takoje abmierkavańnie pravodziłasia, u pradstaŭlenych u Miniust dakumientach nazvana nie było», — skazaŭ jon.

Viktar Hałavanaŭ abvierhnuŭ infarmacyju, jakuju raspaŭsiudžvajuć niekatoryja ŚMI, ab tym, što Miniust vynies admoŭnaje zaklučeńnie na rašeńnie Minharsavieta pa inšych pryčynach.

«Heta pravavoje pytańnie», — skazaŭ jon. Minharsaviet moža viarnucca da jaho razhladu i, likvidavaŭšy parušeńni, znoŭ nakiravać rašeńnie dla praviadzieńnia pravavoj ekśpiertyzy, padkreśliŭ Viktar Hałavanaŭ.

Jak paviedamlałasia raniej, z prapanovaj pierajmienavać vulicu Biersana ŭ vulicu Edvarda Vajniłoviča ŭ Minharsaviet źviarnuŭsia ksiondz‑mahistr, nastajaciel Čyrvonaha kaścioła Uładzisłaŭ Zavalniuk. Edvard Vajniłovič byŭ vydatnym hramadskim i palityčnym dziejačam Biełarusi, miecenatam. Na siesii deputaty padtrymali zvarot hramadskaj arhanizacyi «Tavarystva biełaruskaj movy» ab prysvajeńni prajektujemaj vulicy numar 1 ad praśpiekta «Haziety «Źviazda» da vulicy Hurskaha (u mikrarajonie žyłoj zabudovy ŭ miežach vulicy Hurskaha — praśpiekta Dziaržynskaha — raki Myška) imia narodnaha piśmieńnika Biełarusi Janki Bryla. Akramia taho, uličvajučy, što 2007 hod abvieščany JUNIESKA hodam Lva Sapiehi, jany pryniali rašeńnie ab prysvajeńni prajektujemaj vulicy numar 2 na ŭčastku ad prajektujemaj vulicy numar 1 da vulicy Hurskaha (u mikrarajonie žyłoj zabudovy ŭ miežach vulicy Hurskaha — praśpiekta Dziaržynskaha — raki Myška) imia hetaha viadomaha biełaruskaha dziaržaŭnaha dziejača XVI — pieršaj pałaviny XVII stahodździa.

Pavodle BIEŁTA