Palina Šuba: historyja ŭźlotu spadarožnicy Alaksandra Łukašenki
Staradarožskaja vydatnica dabiłasia pryznańnia nie tolki na konkursach pryhažości.
29.12.2014 / 22:33
Sioleta rasijskaja žurnalistka Ksienija Sabčak zapytałasia ŭ Alaksandra Łukašenki pra dziaŭčat, ź jakimi toj chodzić na raznastajnyja mierapryjemstvy.
«U apošni raz, pa-mojmu, z Palinaj siadzieli, viadučaj. Z 12 hadoŭ jaje viedaju!» — pryznaŭsia Łukašenka.
Praź niekalki dzion paśla hetaha intervju žurnalisty pahutaryli ź cieščaj kiraŭnika dziaržavy, Alenaj Žaŭniarovič. Łukašenka vielmi chvaliŭ jaje ŭ razmovie u Sabčak.
Ciešča pakazała svoj fotaalbom. Samym cikavym u im akazaŭsia zdymak, na jaki trapiła vialikaja kampanija haściej.
Na fota, aproč samoha Alaksandra Łukašenki, syn Viktar, tenisny trenier Siarhiej Ciacieryn, miljanier Alaksandr Šakucin sa svajoj prateže — śpiavačkaj Alonaj Łanskoj, asabistaja doktarka Śviatłana Kanašenka… i Palina Šuba.
Čym ža admietnaja Palina, što Alaksandr Łukašenka biare jaje ŭ padarožža pa rodnych miaścinach siabroŭskim kołam?
«Naša Niva» raskazvaje historyju ŭźlotu dziaŭčyny.
«Tvar novaha stahodździa»
Žyćcio školnicy sa Starych Daroh Paliny Šuby pierakuliłasia ŭ 2003 hodzie.
Madelnaja škoła «Tamara» voś užo niekalki hadoŭ ładziła konkurs «Tvar novaha stahodździa». Sotni dziaŭčat z usioj Biełarusi dasyłali svaje zdymki, samyja pryhožyja ź ich traplali na staronki «Sovietskoj Biełoruśsii».
Kankursantkam musiła być ad 15 da 25 hadoŭ. Maładych i pierśpiektyŭnych zabirała sabie «Tamara» — ułaśnica škoły Tamara Hančarova, adna ź pieršych biełaruskich madelaŭ.
Palina Šuba dasłała svoj zdymak, jak tolki joj spoŭniłasia 15 hadoŭ. Fota adrazu było nadrukavanaje, dziaŭčynka trapiła ŭ paŭfinał konkursu, i jaje zaprasili ŭ «Tamaru». A heta mahčymaść «zaśviacicca» na madelnych pakazach va ŭsim śviecie.
Fota tamaramodels.com
Ale nie tolki heta. Hienieralnym partnioram «Tvaru novaha stahodździa» vystupaŭ Piotr Listerman, jaki pieraciahvaŭ biełarusak u Maskvu. Imia rasijskaha hieroja śvieckaj chroniki hrymieła ŭ siaredzinie hłamurnych 2000-ch. Listerman nie chavaŭ krynicy svajho asnoŭnaha prybytku — jon zvodziŭ madelek z aliharchami. Tavar štučny, tamu i apłata była adpaviednaja.
Zrešty, niekatoryja znachodzili svajo kachańnie i bieź jahonaj dapamohi. Naprykład, na pieršym sa štohadovych konkursaŭ najlepšaj fotamadellu była pryznanaja Ksienija Rubčenia. Praź niekalki hadoŭ paśla pieramohi jana vyjšła zamuž za tenisista Maksima Mirnaha.
A Šuba ŭsio ž apynułasia ŭ Maskvie. Praŭda, nie adrazu. Kantrakt z rasijskim ahienctvam «Freš-Madełs» jana padpisała paśla ŭdziełu ŭ «Mis Biełaruś — 2008».
Madel-razumnica
U hramadstvie isnuje stereatyp pra madelek. Čaściakom ich usprymajuć jak niedalokich asobaŭ. Ale prykład Paliny śviedčyć pra advarotnaje.
Apošnija hady vučoby ŭ škole joj daviałosia sumiaščać z modnymi pakazami, ale heta nie pieraškodziła dziaŭčynie atrymać załaty miedal.
«Heta byŭ vielmi razumny kłas, usie pastupili adrazu! Piaciora miedalistaŭ. I adna ź ich Palina», — uzhadvaje kłasnaja kiraŭnica dziaŭčyny. Nastaŭnica matematyki Staradarožskaj škoły №2 Maryja Žukaviec adpracavała amal paŭstahodździa i tolki sioleta syšła na spačyn.
«Palina była starannaja, roŭnaja vučanica. U jaje što zamiežnaja mova, što litaratura, što matematyka — usio ŭdavałasia. Choć joj bližej usio ž fiłałahičnyja pradmiety», — raskazvaje jana. Maryja Vasileŭna adznačaje, što mienavita na Palinie lažała adkaznaść za praviadzieńnie mierapryjemstvaŭ. «Zaŭsiody treba, kab byŭ zavadatar u kłasie. I ŭsio było na joj», — kaža kłasnaja kiraŭnica.
Razam z baćkam. Fota Facebook.com
Kvietki dla Łukašenki
Aproč madelnaha biznesu, Palina zajmałasia jašče i tancami. U miascovy ansambl «Rasinka» jana pryjšła ŭ 6 hadoŭ i zastałasia tam da kanca škoły. Alaksandr Łukašenka kazaŭ, što daŭno znajomy z Palinaj. Jak kažuć byłyja adnakłaśniki dziaŭčyny, šmat u čym dziakujučy «Rasincy».
Letam 2001 hoda va ŭsioj krainie išła pieradvybarčaja kampanija. Apazicyjnyja kandydaty abirali miž saboj «adzinaha», a Alaksandr Łukašenka kataŭsia pa krainie. Nibyta pa spravach, ale ŭ rajcentrach na jahonym šlachu miascovymi ŭładami ładzilisia vialikija mitynhi ŭ padtrymku «kandydata Łukašenki».
U Starych Darohach pryjezd kiraŭnika dziaržavy prymierkavali da adkryćcia Pałaca kultury. Miascovaja «rajonka» niekalki numaroŭ zapar, zachlobvajučysia, raskazvała pra ŭražańni ščaślivych udzielnikaŭ sustrečy z Łukašenkam.
Na hetym śviacie mienavita 13-hadovaj Palinie Šubie daručyli pieradać kvietki kiraŭniku dziaržavy. Čamu mienavita joj?
«Palina ź dziacinstva vyłučałasia vydatnaj źniešnaściu, była adnoj z najlepšych u «Rasincy», dyj sama ź vielmi dobraj siamji. Usio heta ŭ sumie i pryviało da taho, što vybrali mienavita jaje», — razvažaje adnakłaśnica Iryna Žukava.
Da siamji Šubaŭ u horadzie staviacca z pavahaj. Tata Siarhiej uznačalvaje Staradarožskija rajonnyja elektryčnyja sietki, a jahonaja žonka Ludmiła pracuje śpiecyjalistam u Centry sacyjalnaha absłuhoŭvańnia nasielnictva.
Darečy, aproč Paliny, u siamji jość starejšy syn Illa. Jon pajšoŭ baćkavaj darohaj i taksama staŭ enierhietykam.
Siarhiej i Ludmiła Šuby. Fota Odnoklassniki.ru
U Starych Darohach žyvie trochi bolš za 10 tysiač čałaviek. Bolšaść damoŭ u horadzie adna- i dvuchpaviarchovyja. I tolki niekalki vysokich. U adnym ź ich u pačatku 1990-ch i pasialalisia Šuby. Susiedzi adhukajucca pra siamju vyklučna stanoŭča.
Bałharskaje kachańnie
«Heta było załatoje dzicia, nijakich prablem ź joj nikoli nie było. Takaja vychavanaja, dobrazyčlivaja… — uzhadvaje pra Palinu kłasnaja kiraŭnica. — I pryhožaja, viadoma. U kłasie ŭsie chłopčyki ŭ jaje byli zakachanyja!»
Fota tamaramodels.com
Ci byli źviazanyja z Palinaj pryhožyja ramantyčnyja historyi? Adnakłaśniki nie raskazvajuć padrabiaznaści.
«Kali Palina jeździła ŭ Bałharyju, u jaje tam byŭ miascovy chłopčyk, pa-mojmu, Ivan. Voś tam była ramantyka ŭ jaje! Takaja luboŭ-markoŭ była… Nu, vy razumiejecie, padletkavy ŭzrost, usio takoje. Heta ŭ kłasie vośmym było», — uzhadvaje adnu z historyj adnakłaśnica Julija Žbankova.
Studentka-madel
U svaich intervju Palina Šuba kazała, što zaŭsiody maryła stać žurnalistkaj. Adnak na centralizavanym testavańni pajšła zdavać svaje profilnyja pradmiety — matematyku i anhlijskuju movu.
«Pa bałach prachodziła na biudžet u Biełaruski dziaržaŭny techničny ŭniviersitet, voś i pajšła vučycca tudy», — tłumačać adnakłaśniki.
Padčas navučańnia Palina praciahvała pracavać u madelnym biznesie, naprykład, była adnym z tvaraŭ «Miłavicy».
U 2007-m Šuba ŭdzielničała ŭ biełaruskim adbory na konkurs «Supiermadel śvietu». Atrymać hran-pry nie vyjšła, zatoje pryz hladackich simpatyj kanała ANT dastaŭsia joj. A ŭ nastupnym, 2008-m, Palina trapiła ŭ lik 12 finalistak «Mis Biełaruś».
«Paśla finału da Poli padyšła Tamara Hančarova. Jana pryabniała jaje za plečy i skazała: «Šuba, ty šykoŭnaja. Pavier, ty raskošnaja dziaŭčyna, u ciabie adzinaj na konkursie jeŭrapiejskija rysy tvaru». Heta było tak ščyra! Paśla finału ŭsie ŭdzielnicy nakiravalisia na bankiet u haścinicu «Płanieta». Prezident taksama prysutničaŭ», — raskazvała maci Paliny.
Na zarobkach u Maskvie
U mai 2008 hoda pa vynikach konkursu «Mis Biełaruś» dziaŭčyna padpisała kantrakt z ANT, pavodle jakoha na praciahu hoda nie mieła prava brać udzieł u rekłamnych pakazach i zdymacca ŭ rekłamie. Ale nieŭzabavie Palina pieraviałasia na zavočnuju formu navučańnia i źjechała ŭ Rasiju.
Pryčyna? «Kab zarabić hrošaj na ŭłasnaje žyllo samastojna, biez dapamohi baćkoŭ. U Minsku heta nierealna», — tłumačyć Iryna Žukava.
U katałohu maskoŭskaha madelnaha ahienctva «Freš» Palina źjaviłasia ŭ pačatku 2009 hoda i pratrymałasia tam da vosieni 2011 hoda.
«Zastavacca za miažoj jana nie chacieła. Maskvu nikoli nie lubiła i žyła tolki maraj chutčej nazaŭždy viarnucca ŭ Minsk, — praciahvaje Iryna. — Viek madeli niadoŭhi. Kali zrazumieła, što ŭžo čas viartacca na radzimu i budavać svajo žyllo — viarnułasia».
Skulptura Paliny
Viasnoj 2009 hoda paśla rekanstrukcyi ŭračysta adkryvaŭsia minski Teatr opiery i baleta.
Na fasadzie byli ŭstalavanyja statui hreckich hierojaŭ. Źleva, kali stajać tvaram da teatra, znachodzicca muza trahiedyi Mielpamiena. Jaje lapili… z Paliny Šuby.
Šuba — Mielpamiena (źleva)
«Na pošuk naturščyc ja adpraviŭsia ŭ madelnaje ahienctva, dzie što ni dziaŭčyna, to patencyjnaja muza. Podyum litaralna asieŭ ad napłyvu pretendentak, ale kali pradefilavała Palina, usie patuchli», — raskazvaŭ «Respublicy» skulptar Hienadź Burałkin, aŭtar statuj Mielpamieny i Palihimnii. «Asabliva važna było pieradać składki tkanin, — uzhadvała Šuba. — Dla hetaha davodziłasia apranać vilhotnyja sukienki i hadzinami stajać u zastyłaj pozie». U vyniku vobraz dziaŭčyny nazaŭsiody zastaŭsia ŭ minskaj kulturnaj prastory.
Miesca pad soncam
Paśla viartańnia z Maskvy Palina realizavała maru dziacinstva i trapiła na ekran. Jana ŭładkavałasia na pracu ŭ Biełteleradyjokampaniju. Šubu možna ŭbačyć u «Navinach» i — radziej — u «Panaramie». Albo na ŭračystych mierapryjemstvach poruč z Alaksandram Łukašenkam. Kali jany paśpieli paznajomicca bližej?
Fota tamaramodels.com
Znajomyja Paliny nie dajuć dakładnaha adkazu. Niechta miarkuje, što pryhažunia zapomniłasia kiraŭniku dziaržavy jašče svaimi ŭdałymi vystupami na konkursach pryhažości. Niechta ŭzhadvaje, što Šuba jak žurnalistka supravadžała Łukašenku padčas niekalkich zamiežnych vizitaŭ, naprykład, u Vieniesuełu.
Nahladzieŭšysia televizara, susiedzi žartam nazyvajuć Palinu «našaj pieršaj ledzi». Jany pierakananyja, što za ichniuju karalevu pryhažości nie budzie soramna ni ŭ jakoj situacyi.
Fota tamaramodels.com