U Biełarusi raspačataja čarhovaja sprava ŭ dačynieńni da niezaležnaha žurnalista za pracu biez akredytacyi

29.09.2014 / 16:19

 Čarhovaja administracyjnaja sprava za pracu biez akredytacyi raspačataja ŭ dačynieńni da žurnalista ŭ Hrodnie.

Jak paviedamlaje pres-słužba RHA «Biełaruskaja asacyjacyja žurnalistaŭ» (BAŽ), žurnalist Andrej Mialeška atrymaŭ paviedamleńnie z suda Hrodzienskaj vobłaści. U liście za podpisam staršyni suda paviedamlajecca, što sprava ŭ dačynieńni da Mialeški raspačataja na padstavie č. 2 art. 22.9 KoAP (parušeńnie paradku vyrabu i raspaŭsiudžvańnia pradukcyi ŚMI) i nakiravanaja na razhlad u sud Hrodzienskaha rajona. Adpaviednaje paviedamleńnie nakiravanaje taksama va ŭpraŭleńnie ŭnutranych spraŭ Kastryčnickaha rajona Hrodna, dzie prapisany žurnalist.

Mialeška nie viedaje, za jakoje parušeńnie jaho chočuć pryciahnuć da adkaznaści, bo pratakoł ab administracyjnym pravaparušeńni składali bieź jaho ŭdziełu.

Jak adznačaje pres-słužba BAŽ, sioleta heta ŭžo dziaviaty vypadak pryciahnieńnia žurnalista da adkaznaści za pracu na zamiežny ŚMI biez akredytacyi. Na praciahu hoda padobnyja spravy vialisia ŭ dačynieńni da členaŭ BAŽ Alesia Dzianisava (štraf), Alesia Zaleŭskaha (štraf), Alaksandra Burakova (adna sprava za siužet na telekanale «Biełsat», vynik pakul nieviadomy, druhaja — za materyjał na sajcie radyjostancyi «Niamieckaja chvala», pasiadžeńnie 30 vieraśnia), Vitala Siamaški (sprava zakrytaja), Maryny Małčanavaj (štraf) i samoha Andreja Mialeški (štraf).

Akramia taho, šaściora žurnalistaŭ sioleta atrymali papiaredžańni prakuratury za supracoŭnictva z zamiežnymi ŚMI biez akredytacyi.

Mižnarodnyja arhanizacyi daŭno zaklikajuć ułady Biełarusi admianić «anachraničny paradak akredytacyi, jaki parušaje pravy na dostup da infarmacyi».

Pradstaŭnik ABSIE pa pytańniach svabody ŚMI Duńja Mijatavič, jakaja naviedvała Minsk 15—16 vieraśnia hetaha hoda, akcentavała ŭvahu na nieabchodnaści admieny abaviazkovaj akredytacyi žurnalistaŭ.

Biełaruskaja asacyjacyja žurnalistaŭ vystupiła z zajavaj, u jakoj zapatrabavała ad dziaržaŭnych orhanaŭ i słužbovych asob spynić administracyjny pieraśled i nacisk na žurnalistaŭ-fryłansieraŭ u suviazi z raźmiaščeńniem imi materyjałaŭ u zamiežnych ŚMI.