Ministerstva achovy zdaroŭja: Ažyjataž u suviazi sa źmianieńniem pravił prodažu lekaŭ jość tolki ŭ haradach
Zajaviła namieśnik načalnika hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Ludmiła Žylevič.
18.11.2014 / 18:53
Pavodle pastanovy Ministerstva achovy zdaroŭja, jakoje nabyło moc 19 kastryčnika, recepty na lekavyja srodki, realizavanyja za poŭny košt, pavinny zastavacca ŭ aptecy. Heta dla chraničnych chvorych aznačaje dadatkovyja pachody da ŭrača, a dla miedykaŭ — dadatkovuju nahruzku. Na lhotnyja leki recepty zastavalisia ŭ farmaceŭta i raniej.
Žylevič adznačyła, što na pieryfieryi «ŭsio adrehulavana».
«Čałaviek vypisaŭ leki, kupiŭ, zdaŭ recept, — raskazała jana ab tym, jak praces arhanizavany ŭ rehijonach. — Kab nie dapuścić ažyjatažu, da vypiski receptaŭ dałučyli śpiecyjalistaŭ daŭračebnych kabinietaŭ, pamočnikaŭ urača. Pavodle elektronnych zapisaŭ, kali pacyjent nie moža zapisacca da ŭrača siońnia na siońnia, to na zaŭtra — biez prablem. U sielskaj miascovaści ŭ FAPach pavodle zacvierdžanaha śpisu jość šerah lekavych srodkaŭ, taksama fielčary pryvoziać leki pažyłym pacyjentam pa receptach».
Razam z tym Žylevič kanstatavała, što pacyjenty ŭ haradach źviartajucca ŭ Ministerstva achovy zaroŭja sa skarhami na prablemy, źviazanyja z novaj sistemaj vypiski receptaŭ. «Mnie pa hetym pytańni telefanujuć štodnia, — skazała Žylevič. —
Ludzi kažuć, što nie viedajuć, jak atrymać recept. Tym časam mnohija i nie sprabavali źviartacca ŭ miedustanovu».
Žylevič adznačyła, što ŭ pieralik biezrecepturnaha vodpusku lekaŭ kardyjałahičnaj hrupy ŭvachodziać usie preparaty za vyklučeńniem antyarytmičnych i adnoj hrupy błakataraŭ. Usie astatnija 18 hrup preparataŭ adpuskajucca biez receptaŭ. Taksama biez receptaŭ pradajucca try antybijotyki. «Antybijotyki druhoha i treciaha pakaleńniaŭ nikoli nie buduć u biezrecepturnym śpisie preparataŭ. Nidzie ŭ śviecie antybijotyki biez receptu nie pradajucca, i my budziem iści pa hetym šlachu. Heta pytańnie adrehulujecca».