Žurnalista aštrafavali za aśviatleńnie akcyi pamiaci bratoŭ Kalinoŭskich
25.11.2014 / 17:55
Michała Karnieviča abvinavacili va ŭdziele ŭ niesankcyjanavanaj akcyi i dali štraf 15 bazavych vieličyniaŭ (2 miljony 250 tysia rubloŭ). Pasiedžańnie adbyłosia ŭ Leninskim rajonnym sudzie Horadni.
Padstavaj dla spravy Michała Karnieviča stała akcyja pamiaci bratoŭ Kalinoŭskich, jakaja ładzicca kožny hod u Śvisłačy. Michał Karnievič jak akredytavany žurnalist aśviatlaŭ akcyju pa zadańni redakcyi.
Napiaredadni sudu Michał Karnievič paviedamiŭ Radyjo Svaboda, što pozvu jamu dachaty prynios milicyjant 21 listapada:
«U pratakole napisana, što ja znachodziŭsia pobač z pomnikam Kalinoŭskamu, zatym u składzie arhanizavanaj hrupy išoŭ pa vulicy da pomnika Traŭhutu. A potym jašče znachodziŭsia ŭ Jakušoŭcy, dzie braŭ udzieł u niesankcyjanavanym masavym mierapryjemstvie».
Michał Karnievič kaža, što padčas samoha mierapryjemstva nie było nivodnaha čałavieka ŭ milicejskaj formie. «Byli ludzi ŭ cyvilnym, ale jany ni da koha nie padychodzili i nie rabili zaŭvahaŭ. Taksama ŭsiu akcyju zdymaŭ aperatar u cyvilnym».
Adnaho z udzielnikaŭ akcyi ŭ Śvisłačy Jurja Hlebika aštrafavali za ŭdzieł u niesankcyjanavanym masavym mierapryjemstvie na 1,5 miljona rubloŭ.
Raniej Michał Karnievič užo byŭ asudžany pa takim samym artykule, kali aśviatlaŭ akcyi maŭklivaha pratestu ŭ Horadni ŭ 2011 hodzie. Tady jamu prysudzili štraf u 1 miljon biełaruskich rubloŭ.