Mars staŭ bližejšy: «Aryjon» startavaŭ
Rakieta-nośbit «Delta 4» paśpiachova vyvieła kaśmičny karabiel «Orion» na arbitu 5 śniežnia.
05.12.2014 / 16:09
Fota: Steve Nesius/Reuters
Testavy palot «Aryjona» biez ekipažu projdzie ŭ aŭtanomnym režymie. Rakieta «Delta 4» z kaśmičnym aparatam musiła startavać 4 śniežnia ŭ 15:04 pa minskim časie z mysa Kanaviereł.
Zapusk byŭ adkładzieny na 5 śniežnia. Jamu zaminaŭ šerah pryčyn: mocny viecier, pieravyšeńnie tempieratury ŭ ruchavikach centralnaj stupieni rakiety, prablemy z paliŭnym kłapanam dy karabiel, što niečakana prapłyŭ la startavaj placoŭki.
NASA viadzie pramuju tranślacyju palotu aparata.
Aparat «Aryjon» dvojčy praniasie testavy hruz vakoł Ziamli na praciahu čatyroch z pałovaj hadzin, padniaŭšysia na vyšyniu amal 6 tysiač kiłamietraŭ. Pa zakančeńni palotu aparat pryvadnicca ŭ Cichim akijanie.
Zapusk pravodzicca dla pravierki krytyčna važnych sistem karabla, u tym liku funkcyi admieny zapusku ŭ vypadku niepaładak.
Najvialikšy sa zbudavanych čałaviectvam ciepłaabarončych ščytoŭ, što ŭstalavany na «Aryjonie», pieražyvie padčas prachodu praz atmaśfieru nahreŭ da 2800°C.
Płan marsijanskaj ekśpiedycyi NASA
Nadalej NASA płanuje vykarystoŭvać «Aryjon» jak transpart da ekipažu z 4 čałaviek.
U 2025 hodzie NASA źbirajecca skiravać asteroid na łunnuju arbitu, a paśla vysadzić na jaho ludziej. Na 2030 hod płanujecca adasłać pieršy ekipaž na Mars.
Sproby vyvieści čałavieka za arbitu Ziamli pradprymalisia apošni raz čatyry dziasiatki hod tamu.
«Aryjon» musić zamianić «Šatły», što zaviaršyli paloty ŭ 2011 hodzie.